Page 65 - VOS

18 AWEMainta Diabierna, 21 April 2017

AVB ta sigui crea oportunidad pa futbolistanan local

Nickenson Paul a bay Hulanda pa un try-out cu RKC Waalwijk

DIASABRA ultimo e hungado aki Nickenson Paul di SV Dakota a sali

rumbo pa Hulanda pa un try-out. Nickenson Paul a haya e oportunidad pa
bay haci un try-out na Hulanda pa e potencial cu e hungado tin riba cancha.
Despues cu Arubaanse Voetbal Bond a tuma Martin Koopman den servicio
como Director Tecnico, su persona a haci diferente scouting riba diferente
hungado di Aruba. Martin Koopman tin e meta pa manda futbolistanan
Hulanda pa haci un try-out.

Por medio di e contactonan cu Martin Koopman tin personalmente cu
RKC Waalwijk di eerste divisie, a bira posibel pa Nickenson Paul bay haci
un try-out di 3 siman y asina mira kico ta e posibilidad pa e por haya un
chens pa por drenta den e organisacion di RKC-Waalwijk.
Tur esakinan a bira posibel dor di AVB, kende a coopera cu e hungado
aki pa e por yega Hulanda y regresa Aruba bek. AVB kier pa hungadonan
hoben den futbol di Aruba sigui crece y ta buscando oportunidadnan pa
manda hungadonan cu yen potencia den futbol pa haya oportunidad di
haci try-outs.

RKC Waalwijk mes lo percura pa estadia y cuminda pa Nickenson Paul
durante henter e periodo aki, pues no ta encera ningun gasto pa e hungado
y ni AVB pa locual ta e parti aki. Asina aki por mira cu poco, poco AVB
ta implementando diferente proyecto pa asina por duna nos hungadonan
local un oportunidad pa por haci try-out cu e meta pa por haya un chens
pa por drenta un organisacion na Hulanda y sigui crece den futbol. E
hungadonan cu ta bay haci try-outs na Hulanda ta haya e oportunidad di
siña mas tecnica den futbol y dia cu nan bin bek, nan tambe por siña otro
hungadonan e tecnicanan aki.

Dialuna Nickenson Paul hunto cu e prome diesun hungadonan den e try-out
a haya e oportunidad di mira wega di RKC Waalwijk contra Almere City, un
wega cu a termina empata na 1-1. Nickenson Paul y e otro 11 hungado ta
kedando den un internaat, unda cu tur dia nan ta train futbol y ta siñando
mas tecnica pa asina bira miho den futbol. Nickenson Paul ta contento di
por a bay haci e try-out y ta gradici AVB pe oportunidad grandi aki.