Page 31 - MIN VOS 8 APRIL 2017
P. 31
Gobierno a inaugura e di tres batting cage cu a keda entrega na un organisacion
deportivo.
E biaha aki a toca turno na SV Flatstone cu su veld ta wordo uza dor di
organisacionnan manera Giants cu ta haci uzo di esaki diariamente, Valerie
Camacho di Giants a expresa durante e ceremonia di inauguracion.
Despues cu Rockets y Calabas a haya un batting cage moderno, a toca turno na
Flatstone pa inaugura e facilidad aki cu ta carga nomber di Tico Loopstok, un
persona kende for di chikito te cu awor, den diferente calidad, a demostra cu
deporte ta importante den cualkier sociedad. Batting cages ta algo cu Prome
Minister Mike Eman kier mira riba tur veld di baseball y softbol, principalmente pa
yuda muchanan crece y bira grandi den e deporte aki, manera tabata e caso di
Eugene Kingsale, Sidney Ponson y awendia Xander Bogaerts.
Den caso di Flatstone e facilidad di batting cage a wordo dedica na Tico
Loopstop. Sr. Loopstop, sra. Camacho ta splica, a cuminsa den little league y
awendia ta Presidente di SV Flatstone, trahando cu mucha y adulto pa promove
deporte. Esey ta e motibo, segun Valerie Camacho di Giants a bisa, cu a dicidi di
dedica e batting cage na Tico Loopstop. Tabata Camacho kende a acerca
Prome Minister Mike Eman cu e peticion pa veld di Flatstone tambe bini na
remarca pa un di e batting cagenan cu ta wordo instala riba veldnan.
SV Flatstone a wordo funda na 1978 ora cu famia Paskel a pone un tereno
disponibel pa practica deporte. Na 1981 Tico Loopstok a dicidi di tuma e reto pa
maneha SV Flatstone tratando di hiba esaki na un otro nivel. No solamente a
atrae mas ekipo, tanto chikito como grandi, pa haci uzo di e veld, pero a traha
tambe riba mehoracion di e cancha aki. Tico a bisa cu el a haya masha bon
cooperacion di sra. Valerie Camacho y mayornan di Giants Organisation.
“Pero awo tin algo mas cu falta pa e facilidad aki ta completo. Un espacio
multifuncional. Nos lo sigui traha pa logra esaki”, el a bisa.
