Page 43 - MIN ON_Neat

Benny Sevinger: Prome dreamers oficialisa awo por caba nan
estudio como ciudadanonan di Aruba

Thursday, 01 June 2017 20:46
Comparti

Como titular di integracion bou di cual e departamento di DIMAS ta resorta, Minister Benny Sevinger
tabata presente y a hiba palabra na momento cu a haci entrega di nan permiso na e prome dos recipiente
di Proyecto Dreamers.
Sevinger a resalta cu aunke simbolico, e ta un ocasion special no solamente pa e dos rumannan cu a ricibi
nan documento, pero tambe pa nan famia, pa tur otro cu ta den mesun situacion y pa Pais Aruba.
Christian y Christina a ricibi un permiso indefini cu ta nifica cu nan a bira ciudadano di Aruba. ‘Nan por
contribui cu Aruba y nan por contribui cu nan propio destino,’ Minister Sevinger a bisa. ‘Nan por caba
nan estudio y esun cu ta bay traha por haci’e sin ningun problema of preocupacion cu no tin permiso na
ora of no tin permiso mes nan y por planea nan bida pa futuro.’
Sevinger a bay over na recorda con e tema aki tabata riba programa di maneho for di tempo cu a asumi
manda. Prome Minister Mike Eman a haya nan hopi biaha confronta cu muchanan cu no por a bay scol
pa motibo di nan status ilegal. Respetando e derecho internacional na educacion, Prome Minister a
manda un carta pa tur scol caminda a mustra cu no por nenga e mucha di bay scol dor di su status.
Asina mes, tur aña tabata ripara cu ta bolbe surgi e problema cu na fin di aña escolar no por a ricibi nan
diploma. Esey hopi biaha tabata dor cu un of otro mayor no tabatin permiso, e permiso a caduca of e
mucha mes no por a haya permiso paso nan no a wordo registra nunca. Pa tal motibo Gobierno di Aruba
a pidi DIMAS pa haci un investigacion y bin cu proposicion pa un solucion.
Despues di casi dos aña di deliberacion, a reinstitui e ketenpartners y bin cu un structura caminda e
mucha y hobennan aki por yega na nan permiso di firma liber si ta cumpli cu un serie di rekisito. Asina
Proyecto Dreamers a nace y despues di algun siman canando y pronto DIMAS por duna un bista di
cuanto hende a solicita, cuanto di nan ta clasifica y cu ta e retonan cu a topa cune den a ehecucion pa
yega na kico mester wordo haci acerca.

‘Awe nos por bisa comunidad di Aruba cu e proyecto aki ta canando y ta solucionando e problema cu di
otro forma lo tabata dificil pa e Arubianonan nobo aki por keda cla cu nan permiso y nos ta hopi contento
pa esey,’ asina Minister Sevinger a expresa. E ta felicita Minister President Mike Eman y DIMAS pa e
empuhe cu a duna na e iniciativa aki. ‘Minister President tur e añanan aki cu un curason pa soluciona e
problema di tur ciudadano cu ta biba riba nos baranca. Pabien na e dos Dreamers cu awe ta realisa nan
soño y ta duna nan un futuro. Boso ta e futuro generacion di nos pais y asina nos por conta riba boso pa
cu esaki,’ asina Minister a finalisa bisando.