Page 61 - AHATA
P. 61
E prome dignatario na hiba palabra ta Minister Chris Romero cu a duna un update di e
proyecto di vast ferry, y tambe di su viahe di trabao reciente na Mexico City, na unda a
reuni cu autoridadnan di ICAO (International Civil Aviation Organization).
E mandatario a declara cu, como minister di transporte, pa diferente motibo hopi biaha
e mester bay den exterior, pa regla cierto asuntonan pa asina por sigui diversifica nos
turismo treciendo bishitante for di diferente pais.
ROAD MAP FAST FERRY:
Ya den materia di fast ferry, e mandatario a recorda cu dia 21 di December ultimo, el a
firma un MOU hunto cu Minister di Economia di Corsow sr. Steve Martina, pa mustra e
interes cu cada un tin riba e proyecto aki.
El a agrega cu Diaranzon di e siman aki el a reuni cu Camara di Comercio y Industria y
a papia ampliamente riba e tema aki, pa wak con KvK por sostene gobierno cu e
proyecto di fast ferry aki.
E mandatario a señala cu KvK ta mira e proyecto aki como uno hopi positivo, no
solamente den e aspecto di intercambio di pasahero pero tambe den e aspecto di
intercambio di negoshi. Claramente tin hopi trabao cu mester wordo haci pa esaki por
ta un realidad. E mandatario a presenta na prensa, un road map cu nan tin planea cu e
proyecto aki, cual ta mustra kico ta e stakeholders, pero ademas e diferente “key
players” cu ta bay hunta rol den esaki.
Manera por mira riba e road map, na prome lugar tin e coordinadornan di Aruba cu ta e
Ministerio di Transporte, Comunicacion y Sector Primario, y di Corsow Economische
Zaken, entre otro.
Di parti di Aruba tin sr. Luigi Bergen cu ta e funcionario cu ta coordina e proyecto aki pa
Pais Aruba. Di parti di Corsow tin dos persona, cu ta sr. Gilbert Justiana, Nathalie
Petronella.
Ta sigui e process begeleiding, cu ta un hende cu ta guia e proceso di e siguiente
lunanan. Esaki ta na encargo di un Consultancy cu ta dirigi y zorg pa Aruba y Corsow
cana parallel na otro y cana riba e mesun linea.
