Page 5 - ARENDS

MINISTER ARENDS TA FELICITA EKIPO

LOCAL DI TRANSMISION

March 20, 2017 adminarubanative Uncategorized Leave a comment

ORANJESTAD – Como titular di Telecomunicacion, minister Richard Arends a
keda sumamente satisfecho cu e trabou cu nos profesionalnan local a
desempeña durante e transmision di inauguracion di Plaza Padu. Un ekipo
conforma pa personal di TeleAruba, Setar y Departamento di Prensa di Gobierno,
como tambe un elenco di presentado di television cu a duna oido na e yamado di
Minister President Mike Eman a percura pa un transmision di nivel halto. Di e
manera aki, esnan cu no por a yega na centro di gobernacion diabierna anochi,
tambe por a sigui di cerca e momento historico aki como tambe biba cu esnan
presente e emocionnan di e espectaculo.

Minister Arends ta kere nos mester sinti orguyo di conta aki na Aruba cu
tecniconan capacita tras di camara, mescos cu e talento cu nos ta mira via
television e anochi ey como tambe den e contribucionnan di figuranan
importante di nos plantanan di television cu a uni forsa pa honra Padu del
Caribe, Rufo Wever y Lio Booi.

E transmision realisa for di Plasa Padu a cay hopi na agrado di televidentenan,
mescos cu esnan den exterior cu por a sigui’e atrabes di internet. Nos canalnan
local di television a traha hunto demostrando un trabou den ekipo di cual, e
ciudadano ta esun cu a keda beneficia.

Minister di Telecomunicacion ta duna un palabra di pabien y danki ta bay na tur
esnan cu a traha den e esfuerso aki. Ta consciente cu a hinca dianan di
preparacion y hopi ora di trabou, pero na final por mira atras riba calidad di
produccion di clase internacional.