Page 76 - MIN ECEM

Minister Eman: Nos ta traha pa felicidad yega na tur skina di
Aruba

Sunday, 09 April 2017 19:43
Comparti

“Scuchando e hendenan bisa cu luz a yega den San Fuego despues di mas di 40 aña bibando eynan mi ta sinti un
alegria grandi,” e mandatario a expresa despues cu el a cende e prome luz dilanti cas di sr. Win Werleman.

E mandatario a expresa cu e ta hopi contento pa henter San Fuego, pero specialmente pa Win Werleman y henter
su famia. “Den caso di Win Werleman e ta duna’mi un sentido adicional di placer pasobra e ta e meneer cu ta
compaña tur diahuebs ora cu mi bay bario. E ta encabesa henter e parti di SERLIMAR cu ta percura pa e limpiesa
den e barionan. Nada ta di mas pa Win. SERLIMAR tin un regla cu ta haci pafo so limpi, pero tin biaha den bishita
ta topa cu ancianonan cu tin frigidaire bieu den cura. Win y su Team semper ta dispuesto pa yuda nos hendenan.
P’esey ta hopi bunita cu un biaha nos por yuda Win. Nos ta para aki pa henter e bario, pero simbolicamente a
cende e prome luz dilanti cas di sr. Win Werleman y señora,” e mandatario a bisa.
Luz ta wordo poni for di e borchi grandi cu ta indica e ruta di Daimari y Parke Arikok bayendo ariba y na banda
unda cu no tabatin luz. E puntonan di luz nobo ta wordo poni cada pasa un pal’i luz debi cu ta uzando luznan LED y
esaki nan iluminacion ta hopi mas amplio, aunke mas eficiente den consumo di coriente. Ta hustamente esaki ta
permiti Gobierno bini cu mas iluminacion den barionan mientras cu ta cambiando e luznan di caminda tambe.
Pa ELMAR y su personal, Prome Minister Mike Eman a manda palabra di gradicimento. E motibo ta cu nan ta
trahando pa cambia e casi 9 mil luznan di caya pa bombionan LED. Banda di esaki, nan ta creando puntonan di
iluminacion den e barionan cu a bin ta bibando den scuridad pa varios decada caba. Door di e maneho di ELMAR
pa cambia e luznan di caya pa tipo LED ta haci cu ta spaar hopi den e consumo cu Gobierno di e forma aki por a
pone mas luz den barionan cu no tabatin luz. “Y awe den San Fuego nos ta celebra e momento aki tambe cu hopi
alegria. No tin nada mas bunita cu por realisa soño di otronan, tin biaha ta cosnan chikito. Tin biaha bo ta puntra
bo mes di con a tuma un pais, asina desaroya manera Aruba, 50 aña pa aki na San Fuego awe tin luz. Pero nos no
ta wak atras, sino dilanti, y nos ta contento awe SI e luz t’ey. Cu Dios por sigui duna nos e guia, motivacion y
energia pa por haci e trabou aki tur dia pa trece alegria den tur famia. Nos sa cu tin hopi necesidad na Aruba, tin
hopi cos pa haci ainda, pero ayudo di tur y guia di nos Creador nos lo logra hiba felicidad den tur hogar na Aruba.
Nos lo yega tur caminda pa haci un diferencia,” e mandatario a bisa den presencia di habitantenan di San Fuego