Page 36 - AVP

Manjan Tin Reunion Publico Di Staten Y Te Ainda No

Tin Claridad Si Sue Ann Ras A Entrega Su Retiro

 Politica
- 18/08/2019

Informacion cu nos di AWEMainta tin, cu den seno di MEP, tur intento ta ser haci pa
convence Sue Ann Ras, p’e reconsidera su decision y p’e no entrega su stoel como
Parlamentario.

Den fin di siman tabatin varios reunion, pasobra di acuerdo cu nos informacion, Sue Ann
Ras lo a duna cla di conoce su retiro ta valido, y den curso di awe, e lo entrega su carta di
retiro na Presidente di Parlamento, na Prome Minister Evelyn Wever Croes y na Conseho
Electoral.

Unabes cu esaki tuma lugar, lo mester cuminsa cu e proceso pa Luis Bergen drenta
Parlamento. Maske cu Luigi Bergen lo a bisa na algun dirigente di partido, e unico forma
cu e por gradici p’e asiento, si por nombr’e como Director di un di e companianan estatal.
Su preferencia ta bay pa bira Director di Utilities N.V., pero a dicidi di ofrece e puesto di
Director di Tele Aruba, pero e mes no ta sinti mucho p’e posicion aki, pasobra aki
facilmente, nan lo por bula su cabez.

MEP ainda ayera a manifesta di ta prefera pa Sue Ann Ras keda. A purba tur manera pero
parce te cu awe Sue Ann Ras ta dicidido. Dirigencia di MEP, por medio di su Presidente
Hendrik Tevreden a declara na nos cu despues di reces mester tin claridad. Pero te cu
ayera no a yega na ningun consensus cu Sue Ann Ras. Awe sigur e lo no ta presente den
reunion publico di Parlamento.