Page 5 - CITGO

Glenbert Croes: Nos ta balora CITGO pesey nos ta pidi nan
balora nos trahadonan local y contratistanan local

Thursday, 06 April 2017 22:09
Comparti

MEP ta balora PDVSA/CITGO como socio strategico di nos Pais y e importancia di e refineria pa Aruba
pa cual nos Pueblo a lucha duro pa salba.
Den cuadro di e bon relacion y bon cooperacion cu nos kier mira entre Aruba y Venezuela den cuadro di e
rescate di e refineria, Refineria di Aruba N.V. ta e brasa supervisor di e relacion cu CITGO pa asina sigura
cu e aliansa aki tin beneficio berdadero pa Aruba y Venezuela.
Ta pasobra nos ta balora e aliansa cu PDVSA/CITGO, nos ta haci un apelacion sincero y legitimo na nan y
na Refineria di Aruba N.V. pa e denuncianan cu nos a bin ta hayando riba e maltrato na nos trahadonan y
contratistanan local. Nos a ricibi denuncia contra companianan: PMEC,HAFRAN, PDV
MANTENIMIENTO Y PDV CASA, y nos ta pidi e atencion di CITGO Y RDA N.V. pa atende e
denuncianan y tuma carta den e asunto aki pa asina impedi abuso y maltrato na nos trahadonan local y
nos contratistanan local tuma luga.
Ora trahadonan y contratistanan ta yega na e representantenan di Pueblo den e caso aki nos di MEP den
Parlamento ta pasobra nan ta sinti cu Gobierno y e departamentonan concerni unda nan por acudi den
situacion normal a bira lomba pa nan. Di nos banda nos a bisa semper: MEP ta e partido di trahado,
MEP ta un sindicato di pueblo y den cuadro di nos tareanan pa defende y protege nos Pueblo di abuso y
inhusticia di parti di e Gobierno di Anti Pueblo di AVP nos ta atende tur e denuncianan aki y nos ta pidi
TUR concerni pa corigi nan accionnan y conducta. Nos ta duna tur e oportunidad pa rectifica e
asuntonan aki pasobra den e Gobierno nobo di MEP e situacionnan aki sigur lo no wordo tolera.
Nos di MEP cu a lucha pa rescata e refineria di Aruba pa felicidad y prosperidad di henter nos Pueblo tin
fe cu e Gobierno nobo di MEP lo tin un bon relacion a traves di nos compania nacional di refineria RDA
N.V. cu CITGO, cu nos lo tin un bon relacion cu Venezuela pa asina conhuntamente duna contenido
husto na e win-win/ganar-ganar cu e refineria di Aruba su reapertura mester representa pa nos ambos
Pueblonan. Lo unico cu nos ta exigi firmemente: Trata y paga nos trahadonan bon...trata y paga nos
contratistanan local bon.