Page 2 - AAA JAN 18

Airport hotel lo haci 'groundbreaking' diabierna awor

Posted on 01/18/2017 9:19 am AST | Updated on 01/18/2017 10:04 am AST

ORANJESTAD - Despues cu e anuncio a bin na mei di aña pasa cu Aruba ta haya un hotel extra, banda di
aeropuerto, despues di lunas di preparacion, diabierna awor esaki lo tene su ceremonia di ground
breaking. NoticiaCla.com a compronde cu e nomber di e hotel lo ta "Aruba Airport Hotel & Business
Center", y segun por a tuma nota di e invitacion, lo ta na encargo di Hyatt Place como operador.

ANUNCIO INICIAL

Tabata na mei di aña pasa cu e informacion a bin cu tur cos tabata practicamente cla pa construccion di
un Airport Boutique Hotel cuminsa, riba un tereno net banda di nos aeropuerto. E momento ey no
tabata conoci cua operador lo maneha e propiedad di 120 camber, pero NoticiaCla.com a confirma cu e
inversionistanan tabata un combinacion di un grupo Venezolano/Mericano. E tempo ey (awor ex)
mandatario di turismo Otmar Oduber a confirma di e plan aki na NoticiaCla.com. Segun e ex mandatario,
'gobierno ta sostene e grupo aki y ta mira dilanti pa un bunita proyecto cu lo beneficia nos turismo'.

WARDANDO BOUWVERGUNNING

Mientras cu e parti di estetica di e plannan a keda aproba caba, e inversionistanan tabata wardando
riba e bouwvergunning di DOW pa nan por a cuminsa construccion mesora, mirando cu e parti di
financiamento ya tabata aproba caba. A splica cu aworaki tin turistanan cu ta uza Aruba como hub y ta
keda apenas un of dos dia pa sigui nan destino. Nan tin cu uza camber di hotel cu lo por a wordo uza pa
turistanan di largo duracion y pues por stroba e proceso aki.

MAS META CU SOLAMENTE HOTEL

Ademas, fuera di cu e lo brinda pasaheronan e posibilidad pa un corto estadia, e ta crea oportunidad
tambe pa e companianan di huur auto cu no a keda cla cu tereno y of lugar na aeropuerto pa nan opera.
Aworaki tin apenas 8 of 9 di e total di mas di 40 compania di carrental, cu ta operando pafo di
aeropuerto. Lo crea un parkeergarage unda cu tur e otronan aki lo por staciona y duna un miho servicio
na e turista tambe. Pues e proyecto lo tin mas cu un funcion, estilo manera cu tin na p.e. Miami.

HOTEL CLA PA FIN DI 2017

E intencion anuncia e momento ey, tabata pa e construccion cuminsa mesora nan keda cla cu e permiso
di construccion, y tabata premira cu pa un proyecto asina, lo por keda cla den un periodo di entre 14 pa
18 luna despues cu nan cuminsa cu e parti di construccion. Esey a pone cu pa fin di 2017 of comienso di
2018 Aruba lo por tabatin su prome airport boutique hotel. Awor ta mustra pues cu esaki lo bira
comienso di 2018 prome cu e hotel aki por ta operacional.