Page 27 - MIN VOS

Jacky Van Putten (POR): E Guerra Di Lotto

 Local

 Politica
- 22/03/2017

“Ultimo dianan por a tende y lesa e situacion cuestionabel di Lotto. Di un banda
por tende e argumento cu Lotto y Gobierno actual, specificamente Minister di
Deporte dr. Alex Schwengle no a maneha deporte corectamente y cu e fondonan
cu Lotto ta aloca nunca a yega. Minister Schwengle na su turno ta defende su
mes bisando cu Gobierno anterior a laga Lotto casi den bancarota”, segun van
Putten.

“Cada uno ta para riba su punto y no tin aclaracion riba kico en berdad ta
pasando cu Lotto. Lotto ta un Instituto cu a wordo crea pa por genera e finanza
pa deporte di Aruba.Un organo cu mester funciona independiente y pa bienestar
di deporte.Pueblo di Aruba en general, e deportistanan y federacionnan
deportivo specificamente tin e derecho di sa kico en berdad tin di come y bebe
cu e fundacion aki cu mester percura pa continuacion den deporte”, van Putten a
splica.“Mester bin un aclaracion kico ta pasando cu Lotto y ken ta papia berdad.
Esaki por wordo haci facilmente dor di habri e bukinan di Lotto desde comienso.
Ora e tabata bou di e Gobierno anterior y awo pa e ultimo 7 añanan bou di e
Gobierno actual.Transparencia di fondonan publico ta sumamente importante”,
van Putten a enfatisa.

“Mi ta tuma e oportunidad pa puntra Minister Schwengle pa tuma e paso y habri
e bukinan pa tur hende por wak kico Lotto ta genera y kico a wordo gasta, tanto
den tempo di Gobierno anterior y awe bou di su maneho. Laga pueblo mes
huzga dor di ta habri y wak ta ken ta papia berdad. Pa asina finalmente tin
claridad cu fundonan di Lotto”, van Putten a conclui.