Page 36 - HOH
P. 36
Pone un piercing ta masha normal, al menos esey ta loke e hoben Brazilero
Layane Dias tabata pensa, pero algun siman despues el a ripara cu esey no ta e
caso ora cu el a haya sa cu e bacteria Staphylococcus aureus a infecta su
sanger ocasionando un infeccion serio na su wes’i lomba.
Cu su 20 aña, Layane a bay pa pone un piercing na su nanishi banda robes. No
tabata e prome biaha cu e hoben a haci esaki. Na dos ocasion caba, el a haci un
piercing, pero na banda drechi di su nanishi.
Pero e biaha aki durante e boramento, su nanishi a sangra. Poco dia despues su
nanishi a bira cora y hicha, pero e no a worry. Ademas di e sintomanan aki, el a
haya keintura tambe. Layane a hunta un crema y no a worry mucho.
Sin embargo, algun dia despeus, el a lanta cu dolor den lomba. Un biaha mas,
el a uza un remedi contra dolor cu el a cumpra den un botica. E dianan
siguiente tabata un bataya entre e dolor y e calma cu e remedinan tabata dun’e
ora di bebe esakinan.
Pero e dolor a bira mas fuerte, pa cual Layane a bay dokter. Akinan a bin haya
sa cu e tabata tin un infeccion den sanger. Pero ya e hoben no tabata sinti
“nada” den su pianan. El a wordo traslada pa un centro medico pa e capital di
Brazil.
Via di un MRI dokternan a bin haya sa cu e tabata tin pus acumula den su
wesonan. Esaki tabata causa presion ariba su wes’i lomba.
E mester a haya morfina pa wanta e dolor, pero esakinan tabata causa
halucinacionnan y un di e dokternan mester a stop cu e tratamento. Layane a
wordo opera di urgencia pa saca e likido..
Segun e hoben mes ta conta, e neurociruhano cu a atende a splik’e cu’n
bacteria yama Staphylococcus aureus, cu ta transmiti malesanan a traves di
sanger, ta loke a drenta den su organismo.