Page 102 - KPA

Rampenbureau a reuni cu gobierno y a pone plan di accion
den operacion

Monday, 29 May 2017 20:30
Comparti

Rino Hermans, Director interino di Rampenbureau a duna di conoce cu su departamento tabata
siguiendo e caso di e ‘oil spill’ na Trinidad & Tobago for di tempo cu el a sosode na April

, for di diahuebs ultimo a activa e Ekipo Operacional y diadomingo anochi a pone Gobierno di Aruba, den
persona di Prome Minister Mike Eman, na altura di e situacion. Hermans a splica cu hopi biaha nan ta
haya nan mes confronta cu e impresion publico cu nada a wordo haci of no a wordo avisa, mas sin
embargo, e departamento ya tin dianan ta trahando riba e caso. Ta normal cu e departamento concerni ta
atende solamente cu e otro departamentonan necesario y no ta bay den prensa pa no crea panico of
speculacion.
Hermans a reitera durante e accion di limpiesa cu a cuminsa dialuna mainta na Boca Prins hunto cu
DOW y Parke Nacional Arikok, cu dia 23 di april tabatin un incidente caminda fuel oil a sali for di un
tanki y bay den lama. For di diahuebs Boneiro a cuminsa raporta cu ta hayando ‘patches’, dus no tabata
hayando un solo ‘oil spill’. E momento ey a pidi Warda Costa pa sali riba lama y monitorea e situacion,
pero no por a constata nada relevante. E decision di Rampenbureau tabata pa warda te ora e ta mas cerca
y prepara e ‘Ekipo di Respuesta’.
For di momento ey, segun e director interino di Rampenbureau, ta intercambiando informacion cu tur
instancia local y regional al caso, esey tabata e base pa e seccion di planeamento cuminsa traha. “Durante
henter fin di siman nos tabata planea,” Hermans a bisa. “Tabata monitor e grandura y ora ripara cu e
tabata ya visibel, a dicidi cu ta momento pa notifica Prome Minister di e situacion, kico ta nos aporte y
kico ta e plan di accion y esey a sosode diadomingo anochi na Bestuurskantoor.”
Rampenbureau a informa e prome mandatario di kico tur ta e experticio cu tin disponibel na Aruba y con
ta bay atende cu e situacion, incluyendo con a yega na Boca Prins ayera mainta hunto cu DOW. Tambe ta
trahando cu Parke Nacional Arikok caminda nan Rangers ta bay controla nan teritorio, mientras cu
Marinierskazerne lo controla e costa noord di ‘lighthouse’ pa ‘lighthouse’. Ambos instancia ta comunica
directamente cu Rampenbureau cu na su turno ta desplega esfuersonan pa medio di DOW, NGO y
boluntarionan.

Comentarionan (0)