Page 10 - KPA

Tur medaya tin dos banda: Hoben cu a faya den trafico ta
busca atencion riba FaceBook pa perhudica Polis

Wednesday, 26 April 2017 08:20
Comparti

Dim lights

Un hoben cu claramente ta basta activo buscando atencion riba FaceBook ta cambia su storia pa asina
purba perhudica Polisnan riba caya. No ta un secreto cu tin cierto hoben cu ta haci cosnan contra ley y
ora cu Polis atende cu nan, mesora ta busca atencion riba FaceBook pa asina haci manera nan no tabata
robez.

Esaki naturalmente ta trece reaccion di esnan cu tampoco ta gusta Polis pasobra nan tambe ta haci
cosnan robez. Den e caso specifico aki tabata tin un control riba un chauffeur na Pos Chikito. Polis a mira
e hoben aki coriendo iresponsabel cu su auto. Polis a bay su tras mesora. Banda di rotonde di Pos Chikito
ora Polis a bay su tras e no a para mesora. El a purba core pero el a pense bon y a para un tiki mas leu.
Ora cu Polis a bay atende cune, el a cuminsa cu reta Polis cu expresionnan cual Polisnan mester a soporta
pa basta rato. Tur locual el a haci prome, dimes e hoben cu a core iresponsabel den trafico no a pone riba
su FaceBook El a haya un multa pa core iresponsabel treciendo trafico den peliger y a haya tambe un
multa pa keuringskaart. Na dado momento e Polisnan tabata trankil ta atende y trahando nan
procesverbal pero e hoben aki a keda reta e agentenan cu su comportacion. Te cu na dado momento el a
cuminsa graba e agentenan cu e telefon. A bise pa no grabanan. Kizas esey por wordo discuti pasobra ta
su telefon. Di otro banda claramente e grabacion aki no ta cu bon intencion.

Pesey mes e agentenan a bise stop di graba. A keda proba tambe cu e hoben su intencion tabata malo cu e
grabacion pasobra ora e agente a bay pa tapa e telefon, e mesun chauffeur iresponsabel aki a hala su man
y su telefon a cay. E agente no a dale. E mesun agente a coy su telefon di vloer y pone riba hood di auto.
Hasta a bise coy bo telefon pa esaki no kibra. Esey ta loke a sosode. Awor e mesun hoben kier busca
atencion riba FB atacando e agentenan sin pone e berdad unda el a faya. Awor ta sigui riba e caso tambe
cu henter un novela buscando mas atencion pa su eror. Si bo core drechi riba caminda y tin bo papelnan
na ordo, nada ta sosode. Pero no por ta asina cu bo ta comporta bo mes malo y despues intencionalmente
y cu menos bon intencion ta purba graba e agentenan cu un meta pa lastranan riba FB. Si tabata 15 aña
pasa, kizas e agentenan lo a actua diferente cu un educatieve klap cu lo tabata na su lugar den un caso
manera esaki.