Page 17 - MIN ON

Parlamentario sra. Lorna C. Jansen-Varlack Inversionnan
grandi a wordo haci pa cu renobacion di scolnan ful rond di
Aruba

Friday, 10 March 2017 08:59
Comparti

Durante e ultimo 8 aña inversionnan grandi a wordo haci pa cu renobacion di scolnan y hasta tin scolnan
cu a wordo basha completamente abou pa cu e situacion deplorabel cu Gobernacion di AVP a haya nan
aden.

Durante e prome periodo ex minister di enseñansa mr. Arthur Dowers a bishita tur e scolnan rond di
Aruba y a haci un analisis profundo di e estado di e scolnan y nan necesidadnan. Asina a traha un lista di
prioridad pa cu renobacion di e scolnan y a cuminsa busca fondonan cu lo por cubri e gastonan. Cu e
informacion cu nan a haya e tempo ey a traha un plan di accion y asina a logra renoba varios scol durante
e prome periodo di gobernacion. Minister Michelle Hooyboer a sigui cu e plan di accion y durante e di
dos periodo di gobernacion a sigui cu e trabounan di renobacion. Fuera di renobacion di e scolnan a
inverti tambe den e upgrading di maestronan pa loke ta toca diferente cursonan cu a wordo duna.
Cursonan pa yuda guia muchanan cu nan problemanan di comportacion, cursonan di maneho etc. E
presupuesto di Enseñansa durante di añanan a wordo aumenta cu miyones di florin. Inversionnan grandi
pa drecha scolnan ful rond di Aruba. Awor e lider di MEP sra. Evelyn Wever-Croes ta grita cu e tin un
plan pa enseñansa, pero ningun hende ta haya sa kico ta e contenido real di e plan.

Expresa cu bo tin un plan ta facil, pero pueblo kier wak un plan concreto cu metanan a corto plaso y a
largo plaso, accionnan, nomber di e scolnan, fondonan etc. Den pasado e mesun lider aki a sclama cu e
tin un plan pa frena criminalidad, pero te dia di awe pueblo no a wak un plan. Plannan di biento pueblo
lo bay haya si MEP mester goberna un dia. Hendenan bruha cu ta kere cu pueblo ta kere nan
barbaridadnan. Prome cu eleccion lo tende di diferente partidonan di oposicion ki plannan nan tin y kico
nan lo haci ora nan ta na mando. Cierto di nan tawata tey caba y no a haci mucho cos ora nan tawata
minister di enseñansa. Otronan ta priminti cu nan lo ta e cambio, pero tur hende sa cu nan ta e
politiconan populista. Pueblo por wak pa nan mes cua ta tur e scolnan cu a wordo renoba ultimo añanan.
E lista ta largo, por menciona algun di nan cu a wordo renoba of cu a haya mantencion grandi p.e. C.G.
Abraham de Veer school, Augustinus College, Colegio San Nicolas, John Wesley College, Graf von
Zinzendorf Kleuter, Sta. Theresita, John Andrews School,Filomena College basis, Colegio Cristo Rey,
esakinan ta algun di e scolnan pariba di brug. Mester bisa cu oposicion di MEP pa 8 aña largo a vota
contra presupuesto di pais Aruba, contra di progreso di pais, contra inversionnan pa cu renobacion y
mantencion di scolnan. E pregunta cardinal ta: Kico pueblo por spera di MEP den futuro? E contesta ta
cla: NADA!