Page 19 - ARUBA BANK

Den e dianan aki hopi ciudadano a wordo sorprendi negativamente cu e “DEFINITIEVE

AANSLAG” di Grondbelasting. Den e cobransanan aki Gobierno a aplica e tarifanan

nobo, introduci como parti di e pakete di reforma fiscal. Maske cu Gobierno a bisa cu

esaki lo inclui un reduccion di tarifa pa miles di cas, esey no ta locual ta e caso, segun e

reaccionnan for di comunidad y e aanslagen di ciudadanonan cu por a mira.

Hopi a ricibi cobransa cu un aumento cu drastico. Tin casonan caminda e ciudadano

tabata paga 4000 florin y esaki a bira 9000 florin. E aumentonan aki a cay hopi pisa cerca

miles di ciudadano den nos pais.

Esunnan a dirigi nan mes na nan consehero fiscal y e cartanan cu 24ORA.COM a mira di

nan consehero fiscal ta conseha nan cliente pa apela e decision (bezwaar) contra di e

aumento. E oficinanan grandi di conseheronan di Impuesto na Aruba den corespondencia

cu clientenan ta cuestiona e legalidad di e aplicacion di tarifa nobo.

Segun varios di e agencianan di accounting grandi riba nos isla, e ley di grondbelasting ta

papia di un periodo di 5 aña pa cual ta fiha e balor di un propiedad a base di cual ta

stipula e grondbelasting cu tin cu wordo paga. Bao di cierto circumstancia, por ehempel

den caso di un renovacion, ta posibel pa cambia balor di e propiedad y asina por ahusta e

suma riba cual tin cu paga.

Pero segun e Fiscalistanan e ley no ta permiti pa den e 5 añanan ey cambia e suma cu bo

tin cu paga a base di un cambio di tarifa. Es decir, si e balor di e propiedad a subi pa

motibo di un renovacion lo por cambia e suma di aanslag, pero no a base di un cambio di

tarifa den curso di e 5 añanan cu no a transcuri ainda. Awor ta den e siclo di 2017-2021.

Y esey ta hustamente locual Gobierno ta haciendo.