Page 18 - WEB

WEB Aruba a cende luz na rotonde na Tanki Flip

Thursday, 01 December 2016 18:06
Comparti

Pasco a yega den e comunidad di Tanki Flip, ora cu recientemente Luis Oduber, Director General di WEB
Aruba a cende e switch pa asina ilumina e rotonde di Tanki Flip cu luznan colorido y decorativo di Pasco.
WEB ta orguyoso di patrocina e evento cultural aki pa asina fortalece e vinculo cu e comunidad di Aruba.
Luis Oduber di WEB Aruba a informa cu nan ta celebrando nan prome lustro decorando e rotonde. El a
gradici e comision di decoracion pa e tremendo trabou cu nan a haci, incluyendo e anochinan largo
preparando y decorando. “E resultado di e bunita decoracionnan por wordo aprecia ora e luznan cende y
asina por aprecia e palabranan di Paz, Amor, Joy y Dicha ilumina. Ban celebra e ultimo dianan cu amor y
hunto manera un gran famia”, asina Oduber a bisa. E tambe a desea e audiencia y e comunidad di Aruba
feliz dianan di fiesta y un prospero 2017. E comision decorativo a duna un splicacion di e decoracion.
Asina por mira belanan rond di e rotonde cual ta significa paz den e organisacion y entre coleganan, pero
tambe den e comunidad di Aruba. E palabranan cu ta ilumina ta papia pa nan mes. Esaki ta loke e dos
organisacionnan aki ta desea e comunidad di Aruba pa e aña venidero. E comision sigur kier gradici un y
tur cu di un forma of otro a yuda. E anochi a termina cu e ambiente musical di Gaita Autentico. Tur
hende presente a disfruta di e anochi y musica como tambe di e bunita decoracion.