Page 13 - BRANDWEER

Wan Li awor si no mag bende clapchi mas pa 2016 despues
cu a haya hopi clapchi bieu cu fecha cambia

Wednesday, 28 December 2016 19:59
Comparti

Wan Li tabata basta den noticia durante e prome y di dos dia cu por a cuminsa bende clapchi. Durante e
control riba prome dia a bin descubri cu e container ta mal poni y ta un peliger.

Esaki tabata den Santa Helenastraat cu Belgiestraat pabou di e rotonde nobo. Hasta den cura di cas
tabata tin un container cu a bira e deposito di clapchi. Despues cu a descubri e eror aki cerca Wan Li, a
trek in e permiso pa un rato. E comision di vuurwerk a atende cu e doño chines y tog a dune pa busca dos
of otro sitio pa e por muda. Esaki na prome instante casi a logra. Finalmente diaranzon mainta a bay
cune na un pida tereno pega cu Centro di Barrio Playa Pabou. Eynan e chines di Wan Li a haya cu ta un
bon spot. E personal di comision a bise bay DIP haci e proceso mesora. E chines a bisa di lo muda su
containernan trece tambe pabou di biaha. Atardi ora e tabata cla pa cuminsa bende, e comision haciendo
e control a pasa pa asina mira si tur cos ta bon. Pa nan sorpresa a bin descubri un cargamento grandi di
clapchi bieu. A manipula cu e stickernan di e pakinan di clapchi. Den 2016 mag bende clapchi traha den
2015 y 2016. Den e caso aki e chines di Wan Li tabata tin clapchinan di 2013 y 2014 pa e bende y a ranca
e sticker original di fabrica y pone e stickernan di 2016. Esaki ta totalmente prohibi pasobra bo ta
engañando e clientenan. A confisca tur clapchi pa hiba wela y a trek in permiso. Awor si e no ta haya
chens mas. Prome a dune un chens y awor el a comete concientemente un eror mas grandi cu a coste.
Awor el a keda pega tambe cu un container di 20 pia full yena cu clapchi di 2016 pa bende. Controlnan lo
bay continua di parti di e comision di vuurwerk y esnan cu wordo gara cu clapchi bieu di 2014 of mas
bieu mesora ta perde nan permiso y clapchinan.