Page 40 - ATA JAN 19

ATA cu prome anochi informativo na San Nicolas

Wednesday, 18 January 2017 20:01
Comparti

Aruba Tourism Authority conhuntamente cu varios socionan den gobierno, sector priva, NGO’s
y e pueblo di Aruba ta trahando ariba un plan dirigi riba desaroyo duradero di Aruba su
producto turistico.

E plan lo ta uno cu ta tene cuenta cu e balansa entre nos comunidad, nos bishitantenan, nos
socionan y nos medio ambiente, pa asina por alinea y determina siguiente pasonan pa haci di
Aruba uno mas Dushi pa biba, como tal uno Dushi pa bishita. E plan aki ta carga e titulo ‘Cu
Mira pa Futuro’.

Parti di e proceso ta encera yega serca na ciudadanonan pa asina scucha directamente nan
opinion, pensamento y vision pa cu e producto turistico di Aruba. Asina aki, dia 17 di januari
Oficina di Turismo a tene e prome encuentro den bario di San Nicolas. Esaki a tuma lugar den
un seno ameno na YMCA San Nicolas unda CEO di Aruba Tourism Authority, Ronella Tjin Asjoe-
Croes, a hiba palabra yamando un y tur bon bini y elabora riba e rol di A.T.A. A bin splica cu ta
cardinal pa nos desaroya Aruba den un forma sostenibel pa asina por mantene e producto
turistico na un nivel mas halto. E grupo presente a tuma parti na varios ehercicio unda nan ta
haña e oportunidad pa expresa nan opinion riba diferente topiconan.

Asina aki e ciudadanonan a vocifera cu nan ta hopi orguyoso di nos cordialidad, hospitalidad y
cultura, cu hunto ta forma nos identidad. Adicionalmente, hopi tabata di opinion cu tin
areanan riba nos isla cu ta “overdeveloped” y cu nos mester ta mas critico. Gregory
Richardson, cu tambe tabata presente a vocifera esaki indicando cu nos mester “hiba Aruba
den un forma sostenibel cu no solamente ta carga e aspecto economico, pero tambe e aspecto
humano y esun di naturalesa pero tambe e participacion di e pueblo.” Ademas, esnan presente
a indica di kier wak mas fluho di turista na San Nicolas y a elabora riba varios ehempel con nan
ta mira esaki lo por wordo stimula.

Oficina di Turismo sigur tabata contento cu e participacion di e sesion aki y kier gradici tur cu
tabata presente. Esaki tabata e prome edicion y lo wordo sigui pa un sesion na Paradera (18 di
januari) y na Noord (19 di januari). Por subi e pagina di Facebook ‘Cu Mira Pa Futuro’ pa mas
informacion of bishita www.cumirapafuturo.com.