Page 109 - MIN ECEM

Minister Arthur Dowers ta goza di un popularidad
enormemente positivo den nos comunidad

Monday, 29 May 2017 20:23
Comparti

Diabierna ultimo na cas di partido Dakota, candidato riba lista di AVP y tambe e actual Minister
di Husticia, mr. drs. Arthur Dowers, a celebra su cumpleaños den grandi.

Un fiesta cu su team di campañadornan a hinca den otro, pa di e forma aki sorpresa sr. Dowers
kende tawata recordando su fecha natalicio. Ademas di a invita tur su famia y tambe amistades
personal di Arthur Dowers, e team organisador, a extende un invitacion cordial na henter
pueblo di Aruba,cu ta kere den e capasidad di e persona humilde y integro aki. Asina mes cu
tawata tin varios otro actividadnan grandi tumando lugar na e mesun momento riba e fecha aki,
comunidad Arubano a papia cla y ta notabel cu minister Dowers ta gozando di un popularidad
enorme den nos comunidad. Esaki nos ta deduci, ora cu nos a wak e multitud enorme cu a asisti
na e celebracion di Minister Dowers. Segun comentarionan di un di e campañadornan fiel di sr.
Dowers, cu e fiesta aki tawata mucho mas jen di hende cu esun cu nan a organisa 4 aña pasa.
Esey ta duna nos di compronde cu minister Dowers kende desde cu e la lansa su mes como
politico riba e lista di AVP, a keda conoce un aumento den voto personal cada eleccion y esun di
e aña aki nos ta pronostica cu tambe lo bay ta e caso. Pa loke ta trata e fiesta mes, esaki tawata
uno super bon organisa y tanto cuminda como cos di bebe a ser bendi pa di e forma aki recauda
fondo pa e campaña 2017. Animacion di e anochi aki cu a culmina net algun minuut prome cu
diesdos’or di mey anochi, tawata den encargo di entre otro DJ Splash, Robert Maduro cu su
alma next level, Buleria, Janiro and friends como tambe Le Groove hunto cu Loutisa y Galloway
jr. Como maestro di ceremonia tawata tey presente sr. Melvin Gracia y como stage coordinator
esun di mas mihor cu Aruba conoce, esta sra. Mickey Gravenhorst. Pa mas o menos, 9:30 pm,
demas coleganan di partido AVP hunto cu lider di partido sr. Mike Eman acompaña cu
brassband, pa despues sende e 4 belanan symbolisando e proximo 4 añanan di confiansa cu
pueblo lo duna partido di pueblo Aruibano AVP. Henter e publico a canta happy birthday y
despues di esaki tanto minister Dowers, Prome Minister Mike Eman, President di parlamento
Mervin Wyatt Ras, minister Mike De Meza y parlamentario sr. Marlon Sneek a hiba palabra na e
publico enorme cu a asisti. Por ultimo e team Duro cu Dowers kier a gradici tur hende cu a yuda
y duna un man prome, durante y despues di e actividad exitoso aki.