Page 7 - MIN ON
P. 7
Evaluacion positivo pa Facultad di Arte y Sciencia di
Universidad di Aruba
Wednesday, 05 April 2017 10:48
Comparti
Facultad di Arte y Sciencia (FAS) di Universidad di Aruba cu orguyo ta informa cu a haya un evaluacion
positivo di de Nederlands-Vlaamse Accreditatieorganisatie (NVAO).
NVAO ta un organisacion independiente di Hulanda y Belgica y su meta principal ta pa evalua e calidad y
nivel di enseñanza avansa. Un otro meta di NVAO ta pa logra cu riba nivel di enseñanza avansa ta reina
un cultura di calidad. Na oktober ultimo representantenan di NVAO a haci un evaluacion di tanto e
programa Social Work and Development (SW&D) y Organization, Governance and Management (OGM).
Na Februari e rapport cu e evaluacion positivo a drenta y e ta un reconicimento cu e programanan ta
cumpli cu condicionnan internacional. SW&D a haya un evaluacion positivo riba nivel di HBO y OGM a
haya un evaluacion positivo riba nivel di WO-Bachelor. E comunidad di Universidad di Aruba henter ta
orguyoso y awor e diploma di SW&D y OGM lo wordo reconoci internacionalmente por medio di e seyo
di NVAO, una bes cu nan duna nan advies na Minister di enseñanza. E dos departamentonan a wordo
lanta na 2009 bou di guia di e promo decano dr. Paula Kibbelaar.
Na augustus 2013 un decano nobo, mr. Luciano Milliard a asumi e encargo di lidera e facultad y a sigui
cu e proceso pa prepara pa e evaluacion di NVAO. E evaluacion positivo ta nifica cu e programanan di
estudio di e Facultad di Arte y Sciencia ta haya e marca di un instituto internacional specialisa cu
autoridad/capacidad pa evalua programanan riba nivel di enseñanza avansa. Tambe e ta nifica cu e
calidad di SW&D y OGM ta cuadra cu e exigencianan internacional y esaki tin como consecuencia cu e
opleiding ta wordo considera di ta riba mes nivel cu esun di Hulanda y Vlaanderen (Belgica). Pa mas
informacion bishita e pagina di Web di Universidad di Aruba http://www.ua.aw/ of e pagina di
informacion di NVAO mes https://www.nvao.com/recent/news/assessment-aruba