Page 5 - HOH

Angelli Orman ta empleado di luna december na Hospital

Thursday, 08 December 2016 16:28
Comparti

Dialuna ultimo Angeli Orman, nurse na e departamento di “Niet Snijdend 2” na Hospital a ricibi e
sorpresa di su bida for di su coleganan cu a honra su trabao incansabel como empleado di luna di
december 2016. Zorgmanager Esther Mennen a bisa cu fuera cu Angelli ta trahando 12.5 aña caba na
Hospital, e ta un persona hopi dedica y stima den Hospital.

“E ta haci su trabao cu curason, e ta un bon guia pa e pashentnan como tambe nan famia”, asina
Esther Mennen a bisa. Fuera di esey, semper e ta purba mehora e departamento y ta envolve su mes
cu tur cos andando na e momentonan aki, entre otro, e servicio di e departamento como tambe e
calidad. “E tin un actitud hopi positivo den e team y ta trek e otronan hunto cune cu su manera
trankil”, asina e Zorgmanager a enfatisa. E departamento di “Niet Snijdend 2” ta hopi ocupa y e
actitud trankil cu Angelli ta comparti cu su coleganan y cu e pashentnan y famia ta haci cu e trabao
ta bay hopi mas lihe y suave. A honra Angelli como empleado di luna pasobra te hasta den su tempo
liber semper e ta haciendo proyectonan chikito y semper por conta riba dje pa yuda. Tur cu ta traha
cune ta haya cu e mester wordo reconoci pa ta un empleado ehemplar”, Esther Mennen a conclui.
Angelli Orman a cuminsa traha na hospital 12.5 aña pasa manera cu el a caba su estudio na Corsou.
“Semper mi kier a bin bek pa aporta na mi pais cu mi profesion. Mi a dicidi cu mi kier a bin traha y
mi a inscribi na Hospital y nan a tuma mi.

Mi tabata hopi contento, pasobra – hey – mi ta bin cas bek”, segun e nurse cu un actitud splendoroso
a bisa. E la cuminsa traha na e departamento di “Interne” riba di tres piso y despues e la traha dos pa
tres aña riba cirugia y awor aki e tin siete aña ta traha den e departamento di “Niet Snijdend 2”. “E
tabata un sorpresa, mi no a sper’e, pasobra mi ta un hende cu ora nan bay haci un sorpresa semper
mi ta haya sa di algo y semper mi a organisa sorpresa pa mi coleganan. Dus p’ami mi a keda den un
shock. Ora mi a mira mi tata – mi no a spera mi tata mes – pasobra pa casualidad mi a caba di yega
for di Corsou ayera y e no a bisa’mi nada. Mainta mi a papia cune y mi no a ripara net nada na dje.
P’ami e ta un surprise, hopi great”, Angelli a bisa na final. Angelli tin un pasion grandi pa su trabou y
ta bin traha cu entusiasmo tur dia. Hospital ta gradici Angelli pa ta un colega ehemplar y ta felicit’e
pa e reconocimento bon mereci, masha pabien!