Page 19 - UTILITIES 22 MAY 2017

Glenbert Croes bou presion pisa den seno di MEP

Sunday, 21 May 2017 14:06
Comparti

E Parlamentario Glenbert F. Croes, candidato # 29 riba e lista di e partido cu su tata a funda, esta MEP, ta bou
presion enorme di su coleganan di partido y sostenedonan di algun politico specifico. Un ke otro tin di haber cu su
posicion firma na fabor di reapertura y rehabilitacion di refineria, cu desde October 2016 ta den mannan di CITGO.

Manera ta conoci, diaranson ultimo dia 17 di mei, para dilanti cede di MEP na Papilon, el a duna un entrevista
exclusivo na 24ora.com den cual e ta confirma cu e proceso di rehabilitacion di e refineria ta bayendo "de viento en
popa". El a bisa esaki despues di tabatin contacto directo cu fuentenan bon na altura na Caracas, Venezuela. El a bisa
di ta contento cu awor si mas Arubiano lo haya trabou den e parti aki di e trabounan.

Pero, aunke cu den pueblo tabatin aprecio pa e forma di haci politica aki, den cual ya critica ora sinti e necesidad y
sostene ora ta necesario, toch den seno di partido MEP e sentimento ta diferente. Mesora a start un campaña interno
di atake contra e politico. No solamente di coleganan mustrando nan malcontento, pero tambe dor di instrui
satelitenan den media, cu ta sostene partido MEP, pa publicamente ataca Glenbert Croes y consider'e enemigo riba
red social.

Glenbert Croes mes no tabata disponibel ainda pa un comentario pero for di fuentenan yega na dje nos a compronde
cu e no ta laga e atakenan aki strob'e sigui campaña y sigui sostene e esfuersonan pa rehabilita e refineria. E lo ta
presenta dialuna den e conferencia di prensa di MEP y lo contesta tur pregunta, hasta esun cu si tin problema
interno pa e posicion cu el a tuma y tambe riba atakenan riba Facebook pa su contactonan estrecho cu PDVSA.

Durante e ultimo eleccion na September 2013, Glenbert Croes a saca 2366 voto y asina a bira e di 3 "votegetter" di
MEP despues di Evelyn Wever y Xiomara Ruiz. Y e expectativa ta cu e lo sigui subi den e siguiente eleccion, teniendo
cuenta cu su forma diferente di haci politica, compara cu su demas coleganan den e fraccion color gel den
Parlamento.