Page 10 - MIN SJA

AWEMainta Diamars, 6 December 2016 29

Minister Paul Croes ta sostene PANA pa haci casi 300 mucha hopi feliz

DIASABRA mainta y merdia Minister di Asunto Social drs. Paul
Croes a compaña e boluntarionan di fundacion PANA (Pa Amor
di Nos Aruba) den realisa nan actividad anual di ‘Sinterklaas Riba
Caya’.
Pa di dos aña consecutivo, a reparti casi 300 regalo pa muchanan na
Aruba. Te hasta yiu homber di Minister Croes, Paul-Addison a uni
n’e accion y tabata un Mini Pietje haciendo e muchanan contento.

“Organisacion PANA, nos Ministerio y nos team social a regala un
cantidad di mucha di menos recurso casi 300 regalo.
Un gesto sigur di aprecia di e grupo di Venezolanonan residencia
aki na Aruba,” asina Minister Croes a comenta na un di e tres stop
cu a haci durante dia.
“No solamente bo ta regala nan algo material, sino tambe bo ta
inspira un alegria y un sonrisa riba nan cara.”
E dia a cuminsa na Centro di Bario Noord caminda e muchanan a
haya masha hopi regalo cu e organisacion a sa di prepara.
Despues a sigui pa Club Universal na Pos Chikito caminda tambe
tabatin hopi mucha di e becindario a bin recibi regalo.

Pa finalisa, henter e grupo di boluntario, Sinterklaas, Zwarte Piet
y Minister Paul Croes a bishita YMCA na San Nicolas.
“Mi kier a gradici mi ekipo di oficina hunto cu Departamento di
Asunto Social cu sin duda a yuda hopi den e organisacion, tambe
Centro di Bario Noord, Club Universal y YMCA San Nicolas.
Ora bo haci e tipo di esfuersonan aki, e ta yena bo cu satisfaccion
y alegria. Pabien n’e organisacion PANA cu un tremendo iniciativa
y nan por conta cu nos apoyo sigur den futuro,” asina Minister drs.
Paul Croes a finalisa bisando.