Page 23 - HOSPITAAL

Hospital y Brandweer trahando hunto
pa un solo meta cu ta siguridad

BY: LOOP NEWS
06:55, April 11, 2017
26 VIEWS

Den cuadro di renobacion y construccion

Recientemente por a nota Brandweer staciona cerca di e entrada principal di Dr. Horacio E. Oduber
Hospitaal. Esaki den cuadro di inspeccionnan cu mester a wordo haci haciendo uzo di nan ekipo
yama ‘hoogwerker’. E colaboracion cu Brandweer ta esencial y for di comienso Hospital a integra
esaki den su plannan di construccion y renobacion. E cooperacion aki ta sumamente importante pa
percura e siguridad pa tanto pashent, bishitante y empleadonan di Hospital.
En conexion cu e futuro renobacion, Hospital y otro instancia manera Brandweer ta bezig pa mira si
durante e renobacion no tin nada cu lo por bay stroba si surgi un emergencia por ehempel un
candela. A invita Brandweer pa haci un check up di e cobertura necesario pa cumpli cu e
exigencianan existente di Brandweer. Algun punto cu a bin al caso ta cu na tur momento mester tin
pasada liber pa si surgi un calamidad/emergencia pashent, bishitante y empleadonan por sali di
biaha. Brandweer semper ta duna conseho y ta colabora cu Hospital y den e caso aki pa check
rutanan alternativa durante e periodo di renobacion riba e diferente departamentonan. Durante e
construccion di e edificionan nobo tambe a pidi ayudo y instruccion pa e salidanan di emergencia
den caso si esaki no tabata evidente. Pronto lo organisa tambe un tour den e edificio nobo y un
ehercicio of ‘drill’ pa asina Brandweer conoce e parti di Hospital nobo mas miho y
consecuentemente por reacciona mas lihe den caso cu mester di nan ayudo.