Page 14 - R.Arends jan 3

AVP: Ley financiamento partido politico ta bay RvA na januari

Posted on 12/31/2016 11:42 am AST | Updated on 12/31/2016 11:44 am AST

ORANJESTAD - E ley pa reglamenta financiamento di partidonan politico den eleccion mester keda cla
den 2017. Siendo un iniciativa di partido AVP, nunca e no a keda cla aunke cu a priminti varios eleccion
pasa cu esaki lo sosode. "E concepto (di e ley( den su totalidad ta cla" lider di fraccion di AVP Marlon
Sneek a sigura NoticiaCla.com e siman aki. "Ora cu aña habri, den careda di dos siman di januari mi ta
kere cu e ley lo bay Raad van Advies" Sneek a sigui bisa.

PAKICO A TARDA CU E LEY

Segun Sneek, cada bez ta adaptando esaki. "Nos ta buscando e miho ley cu enberdad ta bay traha"
Sneek a bisa. E ta bisa esaki usando Corsou como ehempel. "Corsou tin un ley di financiamento di
partidonan politico, pero ta scucha cu tur hende ta zundra otro cu a cumpra voto, cu nan ta corupto. Y
nos no kier esey" e lider di fraccion di e partido berde a sigui bisa. "Nos no kier tin un ley djies pa bisa cu
nos tin un ley", Sneek a sigui bisa. Riba insistencia di e portal aki, Sneek ta premira cu porta den e di dos
siman di aña, lo entrega e ley na Raad van Advies, pa nan wak e.

PARTIDO MEP

Pa partido MEP, e ley aki ta un 'must' manera cu lider di e partido Evelyn Wever Croes a bisa e portal aki
e siman aki. "Aruba ta e unico pais den Reino cu no tin e ley aki. E tin un necesidad enorme pa e ley aki"
Wever ta bisa. E ta referi na e hecho cu partido AVP ta hinca miyones den campaña, siendo cu MEP su
fondonan no ta yega e suma ey. Como tal Wever kier pa e ley aki bin, pa asina sigura cu tin miho control.
"Mi tin 7 aña den parlamento, mi a bisa desde un principio cu esaki ta un di e prioridadnan" Wever a
bisa. E ta sigura cu el a presenta un nota durante reunionan di IPKO unda cu un di e puntonan crucial ta
esaki. "AVP a priminti cu e ta bin, pero te awe e no a bin ainda" Wever a sigui bisa.