Page 8 - AWEMAINTA

8 AWEMainta Diahuebs, 9 Augustus 2018

Choller a horta tas cu 5 mil $ for di

auto patras di Corte

DEN oranan di diamars mainta un adicto
ambulante a horta un comerciante Venezolano.
Esaki a sosode dilanti di frutería Frangie, cu ta
keda patras di Corte di Husticia.
E adicto ambulante a bay cu su tas, cu tabata
den su auto staciona dilanti e frutería y den
dje tabatin un saco di placa cu mas o menos
5 mil dolar cu e comerciante a caba di colecta.
E comerciante ta atende cu dos barco di fruta.
Den su tas tabatin tambe su pasaporte y demas
pertenencianan importante.

Den oranan laat di atardi e comerciante lo a
haya e informacion cu e adicto ambulante ta
banda di ex Hotel Central. Mesora a pidi pa
presencia di Polis.

Según el a splica e Polisnan, e tabata buscando
su tas ora cu el a topa cu e adicto ambulante
GH, kende el a puntra si e no por sa uda su tas
ta. E conoci di Polis aki, Chico Gang, a bisa e
comerciante cu su tas y placa ta den ex edificio
di Gym Centrum.
Polis hunto cu e comerciante CC y Chico Gang
a drenta e edificio bandona. E edificio no tin
coriente y tabata difícil pa mira bon eyden.
Asina mes nan a bin topa cu otro conoci di
Polis, e choller EK, kende tabatin un tas color
scur hunto cun’e. Ora cu a puntr’e si e tas ta di
dje, el a contesta afirmativo. Polisnan a pidi’e
pa nan mira e tas y asina a bin constata cu den e
tas tabatin un cantidad grandi di biyete di dollar
Mericano. Ora cu nan a bay pafo di e edificio, a
constata cu e tas ta berde scur

Aparentemente e adicto aki t’esun cu lo a horta
e tas for di e auto di e comerciante den oranan
di mainta. No ta conoci si e placa den e saco
tabata completo. E tas cu e pasporte y demas
pertenencianan di e comerciante no a wordo
haya.
E adicto a wordo deteni, pero el a resisti basta
contra su detención. Pa cual mester a pas’e algún
klop. Finalmente a logra control’e y transport’e
pa Warda di Polis. Polis a sigui busca den e
chollerhouse, pero sin resultado. Probablemente
e no tabata kier wordo deteni, pasobra e lo
tin parti di e placa scondi y tin miedo pa otro
choller horta esaki.
E comerciante su preocupacion ta su pasaporte,
cu actualmente ta hopi dificil p’e por haya un
nobo. E comerciante ta biba na Maracaibo y lo
mester bay Caracas y papia cu e Minister concerni
pa mira si e por logra haya un pasaporte nobo y
con liher e lo por haye ta keda un pregunta.