Page 7 - MIN ON

Aruba pabien riba Dia

Internacional di Lenga

Materno, Papiamento!

Published on February 21, 2017 in Educacion/SPLASH
ORANJESTAD, Aruba

Na aña 1993 Unesco (United Nations Educational, Scientific and Cultural Organization)
a proclama cu dia 21 di februari ta Dia Internacional di Idioma Materno. Papiamento ta
e lenga materno di mayoria habitante na Aruba. Fundacion Lanta Papiamento tin como
meta pa concientisa e pueblo cu Papiamento ta e lenga nacional y oficial banda di
Hulandes. E aña aki Unesco a introduci e tema: “Na caminda pa un futuro sostenibel a
base di enseñansa multilingual”.

Kico ta nifica enseñansa multilingual? Enseñansa Multilingual ta ora cu e alumnonan ta
siña 2 of mas lenga a base di nan lenga materno. Actualmente tin 2 scol multilingual,
esta Colegio San Hose y Colegio Conrado Coronel. Pero ta mas cu claro cu no mester
keda na e dos scolnan aki so. Tur scol basico mester haya e oportunidad pa drenta den
e proyecto tremendo aki.

Kico ta e meta di enseñansa multilingual? Enseñansa Multilingual ta:

 enfoca riba calidad di duna les y di siñamento cu enfasis grandi riba comprendemento y
creatividad;
 reenforsa e aspecto cognitivo, kiermen duna e alumno tur posibilidad pa a base di e
lenga materno amplia su conocemento; comprension ta importante pa motivacion y pa
placer den siñamento;
 intensifica dialogo y interaccion entre e maestro y e alumno door di brinda un situacion
caminda cu tin comunicacion directo for di un comienso;
 facilita un relacion mas estrecho entre scol y sociedad y lo kita e barera cu tin
actualmente entre scol y sociedad. Respet pa idioma lo habri caminda pa conocemento
nobo y lo garantisa un interaccion harmonioso entre e diferente gruponan di idioma.

Fundacion Lanta Papiamento ta sigui lucha pa desaroyo y baloracion di Papiamento
den nos comunidad. Papiamento ta parti di nos y el a forma nos; esaki ta conta tanto pa
esnan cu a nace na Aruba como pa esnan cu a bin aporta na nos economia. FLP ta
felicita tur papiado di Papiamento cu e bunita idioma aki. Papiamento ta di nos tur, nos
mester cuid’e, balor’e y respet’e. Union ta haci forza!