Page 18 - FDLP

Andrés Hernández, e deportista Colombiano di crossfit, kende a sufri un accidente di

trafico diabierna ultimo na Aruba, a wordo opera diadomingo caba, y cu exito di e

multiple lesionnan cu el a sufri.

Segun un publicacion den e corant El Pais di Cali, e amigo cu a compañe pa Aruba y

kende tabata hunto cun’e dia di e accidente, esta Santiago Tobon, el a yega Colombia

diasabra anochi y diadomingo mainta 10’or el a drenta sala di operacion. E intervencion

quirurgico tabata uno complica cu a dura shete ora.

E problema ta, segun por a compronde di loke e amigo a splica, cu ora cu nan a accidenta
e vehiculo a cay riba Andres Hernandez, y aparentemente e no tabatin safetybelt bisti.

Esaki a causa cu el a kibra e columna y medula espinal, y tambe a fractura varios ribchi

mientras cu el a bora su pulmon.

Manera ta conoci, mester a transporta e hoben mas lihe posibel pa Colombia pa operacion
mas avansa y e vuelo cu a logra haya tabata costa 16 mil dollar. E hoben na momento di e

accidente tabata inscribi pa participa den Fitville, un competencia di crossfit. E

participantenan a organisa algo pa recauda fondo y yuda cu pago di traslado di e hoben cu

air ambulance bek pa Colombia. A logra esaki den combinacion di prestamo cu e mama a

haci na Colombia tambe.

E hoben, conoci tambe como Kendo, ta interna den cuido intensivo den un hospital na

Cali, pero el a demostra fortalesa mental pa enfrenta e situacion dificil, su amigo a conta.

Y esaki ta algo cu e mester pasobra e specialistanan a bis’e cu e proceso di recuperacion

lo por dura tres aña. Y esaki tambe lo bay costa placa, cu ta wordo calcula na 70 miyon

peso.