Page 5 - MIN ECEM

Prome Minister Eman ta anuncia Parkeo gratis riba

diabierna y diasabra pa celebra Dia Nacional

Thursday, 16 March 2017 15:29
Comparti

Prome Minister Mike Eman den compania di Theo Croes, director di Arubus, a haci e anuncio oficial di
parkeo gratis cu lo tin riba diabierna y diasabra awor, den cuadro di celebracion Dia Nacional di Aruba.
Prome Minister Eman den su introduccion a splica cu esaki ta posibel danki na cooperacion cu el a ricibi
for di Arubus y su colega Minister Mike de Meza.

Esaki ta nifica cu riba diabierna y diasabra lo tin parkeo gratis den centro di ciudad. E ta principalmente
importante riba diabierna, ora cu den oranan di atardi hopi hende ta cuminsa yega centro pa prepara pa
nan participacion den e evento dedica na Padu y inauguracion di Plasa Padu. Apesar cu tin parkeo gratis,
mester corda cu ta permiti pa staciona solamente den e lineanan blanco. No ta permiti pa staciona den e
vaknan geel, ya cu esaki nan ta destina pa esnan cu ta cumpra espacio mensualmente. Aruparking ta haci
control cu no ta staciona den e vaknan geel ni tampoco riba acera. Na mesun momento a recorda e
ciudadanonan cu mester yega na Plasa Nikki Habibe pa participa den e desfile cu ta cuminsa for di eynan
direccion Plasa Padu, cu nan por staciona nan auto banda di e parada grandi di Arubus na Playa y subi cu
e tram cu ta yega te na Plasa Nikki. Riba e dia aki (diabierna), e tram lo core te 9’or di anochi y busnan te
cu 12'or. Director di Arubus, Theo Croes, a agrega cu na e parti patras di parkeo patras di Arubus, lo tin
security canando continuamente pa brinda proteccion na e vehiculonan staciona eytras. Busnan lo core
den e area di hotel for di tempran te cu cuarto pa 12 pa e turistanan cu kier presencia inauguracion di
Plasa Padu y e fiesta na Plasa Daniel Leo. Na final un biaha mas Prome Minister Eman a haci un
invitacion na pueblo di Aruba pa participa den e celebracionnan di 18 di maart, entre otro inauguracion
di Plasa Padu dia 17 y ceremonia protocolar dia 18 di maart mainta tempran na Plasa Betico Croes.

http://www.24ora.com/index.php?option=com_content&view=article&id=119844:prome-minister-
eman-ta-anuncia-parkeo-gratis-riba-diabierna-y-diasabra-pa-celebra-dia-
nacional&catid=12:politica&Itemid=18