Page 124 - MIN VOS

Mike Eman na 1000voz: Gobernacion mester tin celebro y
sentimento, aki mi ta mira tur dos

Tuesday, 09 May 2017 20:44
Comparti

Entre e palabranan di pabien y sigur di danki pa presencia y participacion den e evento 1000voz cu a
tuma luga diadomingo ultimo, lider di partido AVP Mike Eman a tuma tempo pa resalta kico ta e
esencia tras di e idea aki.
El a referi na aspectonan manera preparacion, inclusion como tambe e caracteristicanan di un bon
sirbido di pueblo. E mandatario a splica cu ora e ta bishita barionan hende ta puntr’e, despues di mira
tanto desaroyo na Aruba, kico ta su tarea pa e siguiente añanan. “Biniendo hunto aki nos a demostra
kico ta e tarea: Prepara un siguiente generacion y un plan pa e siguiente generacion por carga den
futuro di e pais aki pa Aruba por bisa en berdad nos ta e isla cu no tin nada pa kibr’e.”

Eman a indica cu na momento cu tabatin mester di idea, partido AVP a crea institutonan pa yuda cu
esaki. Prome a crea e Fundacion Estudionan Social Cristian Aruba (FESCA) cu awo ta dedica y carga
nomber di “un gran personahe cu semper a inspira y a duna nos e miho consehonan cu ta Mito Croes,”
Eman a bisa. E otro fundacion, Eman a splica cu ta representa e esencia di e tipo di politica cu nos kier
pa nos pais, un politico di conocemento, pero tambe un politico di alma, curason y consenshi cu ta sra.
Digna Lacle Herrera.

“Un gobernacion mester tin celebro; mi ta contento di mira hopi persona cu tanto capacidad pa
contribui cu ideanan intelectual. Un gobernacion mester tin sentimento pasobra ideanan riba papel no
ta wordo traduci den realidad si no tin un pasion, un debocion, un curason pa haci nan realidad y mi ta
contento pa mira asina tanto curason aki presente tambe,” Eman a bisa, añadiendo cu esnan presente
den sala di Hilton caminda e evento a tuma luga, como esnan pafo wardando ansioso “pa nos carga y
traduci tur e ideanan aki den plan y pensamento cu e siguiente generacionnan ta bay percura pa un
Aruba prospero, un Aruba caminda oportunidad ta yega den tur hogar.”