Page 38 - MIN ON

Fundacion Autismo ta conta cu sosten di Ministerio di
Enseñansa

Thursday, 23 February 2017 17:27
Comparti

Desde su inicio Fundacion Autismo Aruba ta traha duro pa crea conscientisacion y pa logra cu
muchanan bibando cu autismo haya e mesun oportunidadnan den bida cu tur otro mucha. Un di e
oportunidadnan aki ta educacion.

Desde un tempo pa awor e fundacion a bin ta teniendo reunionnan cu Minister Michelle Hooyboer-
Winklaar y cu Departamento di Enseñansa pa trece un tayer unda lo educa e maestronan y otro
educadornan den nos sistema di educacion na con pa anda cu muchanan cu autismo. Autismo of e
spectrum di desorden autistico (ASD) ta un reto grandi pa alumnonan escolar, pero tambe pa
docentenan. Un alumno cu ASD tin problema cu comunicacion, dificultad pa transferi e informacion cu e
tin y adapta na circumstancianan hopi varia na scol. Mucha y personanan cu ASD, sin importa e
intensidad di e desorden neurologico, ta funcciona miho ora tin structura cla den cua nan por siña. E ta
nifica cu docentenan cu mester haya e yabi pa determina e miho forma pa asina saca afo e potencial
maximo di e alumno. Despues di a sali for di reunion cu Minister Hooyboer-Winklaar pa pone e ultimo
tokenan pa e tayer Terapista di Comportacion y miembro di directiva di Fundacion Autismo
Aruba, Uleike Tromp a splica cu e reunion cu Minister Hooyboer-Winklaar ta continuacion di un reunion
anterior. “Actualmente nos ta ocupa cu un proyecto pa maestronan di scol di kleuter y basico. Nos ta
bay trece dos Board Certified Behavioral Analyst pa duna e maestronan un tayer intensivo riba autismo
como tambe e comportacion cu autismo ta bin cune. Esaki ta encera con pa anda cu e mucha den
ambiente di klas”, asina Uleike Tromp a splica.

Logopedista docente di IPA y miembro di directiva di Fundacion Autismo Giselle van Grieken a sigui
splica cu e fundacion a cuminsa desde aña pasa cu un presentacion di e contenido di e tayer na Biblioteca
Nacional unda a toca e tema di autismo den enseñansa y e problema di comportacion, communicacion y
e problemana ariba e area sociaal cu e docente lo por experencia y observa den klas. “Nos a laga dos
mayor intercambia experiencia cu e grupo di docente. Tambe a mustra un video unda por mira con un
mucha cu autismo por comporta den klas. Awor nos ta enfoca riba e tayer di un siman caminda e
docentenan lo haya hopi mas informacion specifico con pa observa y anda cu un mucha cu autismo den
klas. Esaki lo bay tuma luga probablemente na comienso di april,” e ta amplia. “E tayer lo ta un siman
largo y nos a parti’e den dos. Primeramente lo atende dos dia cu enseñansa special despues dos dia
pa scol preparatorio, scol basico y pa MDC y finalmente lo tene un workshop tambe pa tur e lidernan
di centronan di cuido cu lo haya un training intenso pa asina nan ta miho prepara pa anda cu un mucha
autista den klas of den un centro di cuido (y su comportacion special)”, asina Giselle van Grieken a
declara.