Page 10 - KPA
P. 10
AWEMainta Diahuebs, 29 December 2016 13
Un biaha mas
Athlete Sports y Angelo ta
bira victima di ladronicia
DECEMBER ta un luna pa famia y amistadnan bini hunto
pa celebra den paz y harmonia.
Lamentablemente, tambe ta un di e temporadanan festivo cu
esnan di mente corupto y criminal ta mas activo den e unico
cos cu nan sa haci den bida: Horta.
Y Athlete Sports cu Angelo no a keda afo di nan lista di negoshi
pa bishita.
Na Athlete Sports, e antisocialnan aki a bolbe drenta via un
buraco den e dak p’asina busca mercancia pa horta. Nan a
plama casi henter e luga paden. Esnan encarga cu e negoshi a
topa cu e situacion desagradabel aki. Naturalmente doñonan
a entrega keho.
Mientras tanto na Angelo nan a haya un forma pa drenta den e
negoshi, apesar di tur e metodonan cu doñonan a implementa
pa proteha e negoshi. Pues esaki ta mas cu un ocasion cu Angelo
ta bira victima di ladronicia.
Ladronicia a bira algo normal, mescos cu traha of bay scol.
Comerciantenan y ciudadanonan en general ya no sa kico mas
pa haci. E ta algo inevitabel.
Pero algo cu tambe ta inevitabel ta cu mescos cu cosnan bon
no ta dura pa semper, cosnan malo tampoco. Y asina un dia,
pronto of despues, e antisocialnan aki lo paga, y caro.
