Page 39 - ATA

Despues cu e relato completo riba e investigacion cu Banco Central a conduci riba
corupcion a wordo publica ayera riba su website, DIARIO a studia e contenido cu ta
duna motibo serio pa studia e forma con e pais ta funciona.

E pensamento di pueblo ta tambe cu mester bini cambio structural si kier haci algo
contra corupcion cu segun un tercer parti di pueblo ta afecta su propio bienestar.

E gran mayoria di pueblo ta kere den medidanan structural di nos sistema pa por yega

na un solucion.

Uza referendum pa tuma decisionnan importante, laga na hefenan di departamento pa
nombra personal, introduci ley pa regla e forma cu ta financia partido politico, introduci

Camara di Integridad, permiti informacion secreto wordo revela, introduci eleccion
separa pa gobierno y pa parlamento ta e solucionnan cu a haya un sosten di un
mayoria absoluto di personanan cu a tuma parti na e encuesta como base di e
investigacion.

Mientras mayoria di persona ta kere cu mester raporta corupcion cu tin efecto riba nan,
tin motibo cu nan no ta actua contra corupcion cu segun e relato ta presenta su mes
den practicamente tur sector di comunidad pero na e escala mas halto den e ambiente

politico y tur loke tin relacion cu e funcionamento di estado pa medio politico.

Miedo pa denuncia corupcion a wordo treci dilanti. Segun e personanan cu mester a
duna nan informacion den e investigacion nan ta tene cuenta cu resultado cu denuncia

di corupcion por tin pa nan.

Un parti a sinti tambe cu nada lo wordo haci pa nan mientras tin un grupo considerabel
cu no ta na haltura unda nan mester denuncia corupcion.

E rapport ta indica claramente cu mester introduci e Camara di Integridad pero tambe
mester yega na medida structural pa deshaci di e mal imagen cu pueblo tin di e forma
cu e pais ta funciona den su totalidad.

https://www.diario.aw/2019/08/pueblo-tin-miedo-pa-raporta-corupcion/