Page 8 - CMB

Comision organisado di Crossing for Hope hunto cu Aruba Dolphins Swimming ta

gradici pueblo di Aruba pa e recepcion masal cu nos 5 landadonan a ricibi diadomingo

dia 11 di november 2018.

E tabata momentonan emocional y di orguyo pa un y tur presente y tambe pa esnan cu a

presencia e momentonan aki via television, radio of facebook sea na Aruba of den

exterior. E landadonan a sali cu velocidad halto fo’i Venezuela pero yegando Aruba e

stroom tabata masha duro mes. Davy Bisslik a yega Santo Largo pero a dicidi di landa

bin Zeerovers y logra yega despues di un landa di 8:20 ora (36.06 km). Stephan Thijsen a

subi tera na Barcadera despues di un landa di 8:41 ora (37.37 km). Sigui pa Romar

Arendsz cu tambe a subi tera na Barcadera y a landa 8:47 ora (40.92 km). E prome dama

cu a landa di Venezuela pa Aruba, Wendy Kock, cu a impresiona publico presente a subi

tera na Surfside Marina y a landa net 10 ora (43 km). Deaxo Croes tambe a yega Aruba

na Barcadera y a landa 10:20 ora (42.42 km). E landadonan ta gradici coach Roly Bisslik
pa su dedicacion, conseho y inspiracion.

Un danki grandi na tur medionan di comunicacion cu a aporta nan tempo y dedicacion na

promove Crossing for Hope y a publica di un manera of otro e trainingnan y/of evento

prome, durante y despues. Sin laga afo esnan cu a transmiti live y a captura lo mas
esencial di e yegada di cada landado. Tambe un gradicimento na nos fotografonan di

Aruba Dolphins, Alvin Croes, Armando Goedgedrag y Marvin van der Linde. Un

gratitud na 297Sports cu tabata para tras di e landadonan di inicio di nan preparacion. No

tin palabra pa gradici Ingenuity Creative Marketing (Jeff Lopez y Robert Tromp) pa e

trabou cu nan ta eherciendo, cual ta produci un documentario. Pueblo di Aruba por keda

pendiente pa esaki. Sin laga afo, danki pa a yuda nos maneha e area di prensa.