Page 8 - WEB

*Investigacionnan criminal lo sigui cu yudansa di CEO nobo

ORANJESTAD (AAN) — E decision di Corte di Delware ayera ta confirma cu na e
momentonan aki Juan Guaidó tin e autoridad pa dicidi riba gerencia di e compania

estatal Venezolano, Citgo.

Den e cuadro aki tambe Hues a confirma cu e Hunta di Directiva di Citgo cu Juan
Guaidó como Presidente Interino, a base di e decision di Asamblea Nacional, a nombra

pa Citgo, ta wordo reconoci como gerencia oficial di Citgo na Merca.

Den e serie di casonan cu Corte na Merca mester a atende relaciona cu Citgo, a wordo
añadi e caso cu e Hunta di Directornan nombra pa regimen Maduro a cuminsa

recientemente contra e Hunta cu Juan Guaidó a nombra.

E grupo di Maduro a opone e hecho cu e grupo di Guaidó a haya autoridad den Citgo y
a cuminsa un caso den Corte, cu ayera a dicta sentencia, cu awor ta haci oficial pa e

grupo Guaidó por atende asuntonan importante cu ta spera.

Na prome luga e hecho cu segun Hues ta grupo Guaidó ta dicidi ta nifica, cu e CEO
nobo cu e directiva di Citgo a nombra, oficialmente por haci su trabou.

E mester cuminsa atende e refinanciamento di e debe na cual e parti mas grandi di
Citgo ta mara como borg. Ta trata aki di e debe 2020, cu Nicolas Maduro a cera na
2016 cu un grupo Mericano/Britanico y cu tabata asina importante pa Maduro cu el a

encarcela e grupo di Nelson Martinez cu tras di su lomba a bay busca otro grupo den e
tempo cu tabata negocia cu Aruba tambe.

Pa Aruba e sentencia di Hues ta confirma cu Aruba mester bay negocia kiebra di e

contracto cu Citgo cu e CEO nobo cu awor tin un nombramento cu sosten di Corte di
Merca.

Tanto Nelson Martinez como Asdrubal Chavez tabata militarnan na servicio di

Chavismo. Awor Aruba mester bay negocia cu un veterano cu un carera largo den
mundo petrolero.