Page 39 - UTLITIES DEC 13

N.V. ELMAR a experencia un fin di siman cu diferente
storing

Monday, 12 December 2016 20:27
Comparti

No tabata un fin di siman normal, pasobra clientenan di N.V. ELMAR a experencia varios fayo
, for di diabierna te cu diadomingo. Lamentablemente e fayonan aki tabata for di man di e compania di
distribucion di coriente mes, pero su tecniconan a sa di mobilisa lihe pa por a drecha e fayonan y
reconecta suministro di coriente mas lihe posibel.
"Weekend tabata druk pa nos di N.V. ELMAR, cuminsando for di diabierna caba, unda tabatin un fayo
basta grandi na Paradera, ora cu pa motibo di biento fuerte compaña cu awasero, un kabel di tension
halto a kibra, lagando e districto di Paradera hunto cu e barionan di Sero Blanco y Pavia sin coriente",
asina Jonathan van der Linden, Maintenance Specialist na N.V. ELMAR a duna di conoce. El a conta cu
tecniconan a activa mesora, a bay na e sitio pa tuma nota di e fayo y pa haci adaptacion pa por a reactiva
tur cliente bek riba e red di distribucion.
"Pero un rato despues, diasabra marduga nos ta haya nos cu un accidente di auto na Sabana Basora,
unda un auto a dal den un palo di luz cu kabelnan di tension halto", asina Jonathan van der Linden a
splica. Como cu ta kabelnan di tension halto, esey ta haci e storing ta bira mas grandi y e inconveniencia
tambe pasobra ta henter un bario ta perde suministro mesora y cu ta dura largo.
"Esey no ta den man di N.V. ELMAR, pasobra nos ta detecta e problema lihe, pero e ta tuma tempo pa e
tecnico por traha, na un manera sigur, pa por coregi e fayo. Den hopi caso mester saca tecniconan di cas
pa nan yega na e sitio, pa inventarisa e daño, saca hende pa bay magazijn, etc. Tur esaki ta tuma su
tempo", el a splica.
E mesun diasabra tabatin un otro accidente na altura di e rotonde di Tarabana, cu tambe a ranca palo di
coriente. E biaha ey no tabata kabel di tension halto, pero toch tabatin storing, aunke minimal.
Diasabra mainta, na dado momento a perde un cantidad grandi di coriente for di nan red. Esaki no
tabatin di haber cu N.V. ELMAR, pero hunto cu e compania di produccion, a percura pa asina cu WEB
por a garantisa suministro normal, cu a reconecta clientenan bek. Tecniconan mester a activa na tur e
sub stacionnan pendiente pa ora a haya coriente bek.
N.V. ELMAR ta corda tur hende cu den e dianan aki tin hopi awasero, pero tambe ta confronta hopi
accidentenan di auto. Ta pidi automobilistanan pa bay trankilo den trafico pasobra cada biaha ranca un
palo di luz ta causa basta inconveniencia.
Ultimo dianan tin e situacion di tera satura cu awa, cu consecuencia cu matanan ta kita cay nan so,
cadushinan ta cay riba liñanan di coriente y ta causa inconveniencia. Hopi biaha e storingnan ey por ta
mas chikito, pero asina mes e ta bin cu molester pa sea e bario of e casnan den vecindario.
N.V. ELMAR tin un pagina di Facebook awo y ta masha activo. Ta conseha clientenan pa "Like" e pagina
y asina keda na altura di tur fayo, interupcion y specialmente pa sa con tecniconan ta trahando riba e
fayonan menciona pa soluciona mas pronto posibel. E ta un forma moderno pa comunica y tin hende 24
ora pa ta interactivo cu clientenan, specialmente den momento di un fayo.
Tin un campaña awor di “Like & Share” e pagina di N.V. ELMAR riba Facebook cu chens di gana 500
florin na suministro di coriente