Page 51 - MIN SOC DEC 2, 2016

Minister Paul Croes ta duna atencion na hendenan cu
limitacion y ta boga pa nan inclusion den sociedad

Thursday, 01 December 2016 17:59
Comparti

Diamars mainta Minister di Asuntonan Social, drs. Paul Croes a sinta cu directiva di Stichting voor
Verstandelijke Gehandicapten Aruba (SVGA) y a haci recorido di e facilidadnan di Centro Man na Obra y
Pasadia Briyo di Solo. Ambos facilidad ubica na Piedra Plat ta duna cuido y guia na personanan cu
limitacion cu enfasis riba desaroyo di capacidad y independencia.

Grupo di persona cu limitacion ta semper un prioridad pa Minister Croes, pero e bishita en particular aki
tin como meta pa duna atencion adicional na e celebracion di Dia Internacional di Persona cu Limitacion
cu ta diasabra awor 3 di december. E titular di Asuntonan Social ta desea pa, como pueblo, nos ta mas
coneciente di nan derechonan, nan desaroyo, na participacion, nan guia y nan cuido den nos sociedad.
“Te ainda nos ta sinti cu Aruba mester ta mas habri pa persona cu limitacion. Mester tin menos
descriminacion y mas inclusion di e personanan aki na pia di trabou, pero tambe den diferente sector na
Aruba, sea sector deportivo, social of cultural y esey ta e meta di nos bishita tambe awe,” asina Minister
Croes a declara. Hunto cu directora di Departamento di Asuntonan Social y di su propio oficina, Minister
Croes a cuminsa na sinta na mesa y haci un evaluacion di e situacion actual pa identifica areanan
caminda tin espacio pa mehoracion. Tambe tabata e oportunidad perfecto pa director nobo di SVGA, Sra.
Els van Homelen por a trece dilanti nan puntonan. “Mi ta gradici enormemente directiva di SVGA, pero
tambe tur e lider y guia cu ta haci e trabou cu hopi amor y ta dedica na e clientenan aki,” Minister Croes a
expresa. “Bo ta mira tambe cu nan ta sinti nan mes productivo y respeta y esey ta haci nan contento.”