Page 67 - AHATA
P. 67
Mas bien, hopi compania a manda nan barconan direccion di Mexico y tambe Jamaica.
E isla di Cozumel (Mexico) mes siman pasa, a haya un extra impulso di US$19.048.670
den su economia, pasobra nan a ricibi un total di 32 barco crusero pa ancra eynan, di
cual 11 barco no tabata programa pa e periodo ey.
E diesun barconan extra ey a bin busca refugio den e area di Cozumel for di Horcan
Dorian. Si bo considera cu cada barco ta trece turista cu ta gasta $170 pa pasahero, e
ora e 11 extra barconan aki a aporta na US$7.882.900 na e economia Mexicano.
E barconan extra aki a cuminza yega for di 28 di Augustus y a keda yega hasta
Diadomingo 1 di September. E waf di Cozumel facilmente a acomoda tur e barconan
aki cu a invadi e isla.
Segun calculonan haci pa Florida-Caribbean Cruise Association (FCCA) y e capacidad di
cada barco crusero, segun e companianan aki, e 11 barco extra aki a nifica 63.412
turista extra riba e barco. Nan ta extra compara cu e 91.015 turista original cu mester
a bishita Cozumel di 26 pa 31 di Augustus.
Pa colmo, riba Diadomingo 1 di September e isla di Cozumel no tabata spera ningun
barco tampoco. Pero na final di dia, nan a haya 5 crusero inespera. Pues tur hende
local cu ta traha den Turismo, a haya nan ta core ofrece Tour y habri restaurantnan, pa
acomoda e 18.194 turista extra cu a yega riba nan Diadomingo off.
Dialuna 2 di September, e isla di Cozumel tabatin planea pa ricibi 4 crusero
regular. Sinembargo uno di nan a cancela, y esey a laga solamente 3 riba lista. Pero
mesora, cuatro barco crusero mas a haci peticion pa nan bishita Cozumel, y asina e isla
a haya 7 barco toch riba Dialuna cu un total di 22.182 turista.
Riba Diamars 3 di September, Cozumel mester a haya originalmente 2 barco crusero cu
un total di 5.026 bishitante. Pero debi na Horcan Dorian, a pone cu 3 barco crusero
mas a yega y mara na Pier di Cozumel, y a trece 7.032 pasahero extra. Pues un total
di 12.058 turista canando rond riba e isla.
No ta tur isla den Caribe tabatin mesun suerte. Segun e schedule di Aruba Ports, Aruba
mes e siman aki tin nada poni pa haya ‘extra’ barco crusero relaciona cu Horcan Dorian.
