Page 5 - DESPA

Parlamentario Clarisca Velasquez Fraccion di AVP a hanja
update riba construccion di hospitaal

Wednesday, 01 February 2017 10:57
Comparti

Recientemente fraccion di AVP a bishita hospitaal pa hanja informacion riba e construccion di nos
hospitaal nobo. A hanja informacion di tur esnan envolvi den e construccion di e ampliacion y
renobacion. E projecto di ampliacion y renobacion ta den un fase bastante avansa.

Por bisa cu e projecto ta uno hopi moderno cu lo bai cumpli cu normanan international y cu ta bai
garantisa mihor cuido y servicio na nos patientnan. E toren nobo cu ta construyendo ta bai ta pa patient,
un medical office building cu lo bai tin mihor cooperacion entre dokternan ja cu nan lo ta ubica den e
mesun edificio. Y tambe lo tin un sitio di parkeo nobo pa empleadonan situa na parti west di e edificio cu
ta cla y tambe lo bai tin un entrada special pa ambulance cu lo jega te na camber di operacion. Ta
construyendo awor e edificio nobo di 6 piso pa brinda cuido na nos patientnan, den cual lo inclui un piso
pa nos muchanan, un "spoedeisende hulp", un centro di ginecologia y un centro di parto. Lo agrega e
cambernan di operacion cu lo mester cumpli cu criterianan international y moderno y tambe lo kier
agrega e afdeling di ICU cu tambe lo mester cumpli cu normanan international y actualisa. E fraccion di
AVP cu ta esun mas grandi den parlamento ta haciendo su trabao di controla pa asina informa nos
comunidad riba tur desaroyo y sigur di nos hospitaal nobo cu ta pleno construccion. Por bisa cu hospitaal
a confronta cu algun retraso pa algun afdeling cu kier agrega pero ta sigur cu esaki ta na bienestar di
comunidad ora e hospitaal nobo keda cla y pueblo por ta sigur cu lo tin cuido di calidad di cinco streya pa
nos hendenan malo di salud.