Page 75 - ON JAN 17

Otmar Oduber a traha presupuesto 2017 despues di a funda
su propio partido

Monday, 16 January 2017 20:56
Comparti

Declaracion haci pa e miembro di partido Democracia Real, sr Alonso Tromp den entrevista na Canal 90
, a trece hopi claridad riba asuntonan cu tin hopi hende papiando ariba riba desaroyonan relaciona cu
fundacion di e partido politico nobo, E Forsa Nobo, POR.
Alonso a reacciona mainta despues cu lider di Democracia Real, Andin Bikker for di Hulanda a dirigi un
comunicado di prensa oficial di e partido na medionan di comunicacion, cu Alonso for di algun tempo a
wordo aparta for di e partido y cu nunca el a funciona den calidad di miembro di Democracia Real.
Un punto cu a resalta durante di e entrevista aki, ta e hecho cu Alonso Tromp a presenta cu copia di e
statuto nobo di e partido di Otmar Oduber, caminda esaki a bira oficial na luna di Augustus 2016, cu ta
casi tres luna prome cu el a entrega su retiro como Minister di Gabinete Mike Eman II y como miembro
di partido AVP.
E revelacion aki ta confirma cu e plan di lanta un partido nobo y hasta e combinacion cu Democracia
Real su lider, tabata algo cu a inicia for di comienso di 2016, hasta prome cu Otmar Oduber a bishita
Gobernador Refunjol pa prome bes.
Esaki ta nifica cu Otmar Oduber como Minister di Gabinete Mike Eman II, a sinta traha riba presupuesto
di 2017 di pais Aruba, a bay Parlamento pa defende e presupuesto aki y tambe a pone su aprobacion na e
presupuesto aki cu su firma, siendo cu na e momentonan ey, ya caba el a funda su partido nobo
POR. Alonso Tromp a prueba tur esaki tambe cu documento den man.
Declaracion di Alonso ta confirma cu declaracion di Otmar Oduber haci cu durante di 2016 cu su
relacion cu otro miembronan di Conseho di Minister a drecha, no tabata basa riba e berdad ya cu for di e
tempo ey su decision politico nobo, ta tuma caba y for di cual e no por a bin bek mas.
Na mes momento Alonso Tromp, kende a declara cu e tin tur reunion cu lider di Demoracia Real, Andin
Bikker y Otmar Oduber, ta mustra un otro cara di henter e comedia politico aki, cu e ultimo
declaracionnan di e ex Minister di Turismo riba presupuesto di 2017, ta liña recta contra di su propio
decision di sostene y aproba presupuesto di 2017 di Gabinete Mike Eman II.