Page 8 - CMB

Hopi Hende No Ta Denuncianan Ora Nan Enfrenta

Caso Di Soborno

 Local
- 01/09/2019

Loke cu a resalta den e encuesta di Banco Central di Aruba riba corupcion ta e hecho ta
cu mayoria di hende no ta inclina pa raporta nan mesun actonan di soborno. Pero un 23%
a bisa cu nan conoce hende cu a paga pa haya un servicio di Gobierno cu mester ta gratis.

Mayoria di e sobornonan ta den categoria di ID, documentonan, permisonan. E ultimo aki
ta consisti di tres sub-categoria: permisonan, tereno erfpacht y otro documentonan di
Gobierno. Loke ta contribui na hopi soborno ta permisonan di residente y/of labor, di
construccion y permiso comercial pero tambe tereno erfpacht. Cerca di un di cada 10
persona encuesta a bisa cu nan conoce hende cu a paga soborno pa respectivamente
permiso (11%) y tereno di Gobierno (10%).

Rond di un di cada tres encuestado a bisa cu nan tabata personalmente afecta pa
corupcion den nan bida diario. Un gran mayoria (76%) a bisa cu soborno y e uzo di
conexionnan tabata e forma mas facil pa haya un servicio publico na Aruba. Solamente
un tercera parti di esnan encuesta a menciona cu e medidanan contra corupcion a wordo
aplica di forma imparcial. Di tur manera, un gran mayoria tabata positivo di nan mesun
rol den combatimento di corupcion. Casi 7 di 10 persona tabata di acuerdo cu
personanan comun y coriente por haci un diferencia den e lucha contra corupcion, unda
cu 19% no tabata di acuerdo cu esey. A bisa tambe cu dos di e formanan mas efectivo cu
personanan comun y coriente por haci pa yuda combati corupcion na Aruba ta pa raporta
esaki, si nan mira of experencia algo asina of nenga di paga soborno.