Page 67 - JUS

Resientemente a tuma lugá firmamentu di e mandato pa traspaso di sertifikashon di
botonan di Hulanda Karibense entre gezaghèber Edison Rijna i e Direktor General
Alkansabilidat di e ministerio di Infrastruktura i Medio Ambiente, sr. Marc Frequin.

Den e ‘Ordenansa mandato i apoderashon sertifikashon botonan di Hulanda Karibense’
e gezaghèbernan di Boneiru, Sint Eustatius i Saba ta haña e mandato pa ehekutá
tareanan di sertifikashon na nòmber di e hefe di Inspekshon Marítimo a base di e Lei di
Maneho Marítimo pa nabegashon lokal rònt di e islanan di Hulanda Karibense.

Alabes e gezaghèbernan a haña e mandato pa ehekutá investigashon na benefisio di e
sertifikashon. Ta trata den e kaso aki di botonan ku a base di e ‘Vaartuigenwet 1930
BES’ ta registrá serka e kapitan di haf (havenmeester) i ku ta den uso komersial. E
botonan ta kai den e área di nabegashon rondó di e isla na kua e boto ta pertenesé
manera ta stipulá den e Regulashon pa Seguridat di Embarkashon.

E botonan aki ta risibí un sertifikado di seguridat nashonal i e eksigensianan pa esaki ta
stipulá den artíkulo 41b i anekso 6 di e Regulashon pa Seguridat di Embarkashon.
Konforme e palabrashonnan ku a hasi relashoná ku esaki, e gezaghèbernan lo pasa e
outorisashonnan ku nan a haña komo mandato, pa e kapitannan di haf.

E traspaso di tareanan di sertifikashon pa e gezaghèbernan tin motibunan práktiko. E
bentaha pa e doñonan di boto ta ku por realisá hañamentu di pèrmit, registrashon i
sertifikado serka solamente un instansia, esta e kapitan di haf. E bentaha pa
Inspekshon Marítimo ta ku no tin mester di enbolbí inspektor prosedente di Hulanda
Oropeo. Esaki ta hopi mas barata i al final, pa medio di e tarifanan, hopi mas bentahoso
tambe pa e doñonan.