Page 14 - MIN ECEM

Despues cu Gobierno a tuma decision pa e edificio abou
Limpiesa a cuminsa na Bushiri Hotel

Wednesday, 15 February 2017 08:43
Comparti

Despues cu e decision a wordo tuma den Conseho di Minister cu lo basha edificio di Bushiri Hotel abou,
Gobierno a sigui move pa e siguiente fase. Prome Minister Eman despues di Conseho di Minister a splica,
unda e decision aki a wordo tuma, cu e kier pa e trabou cuminsa wordo haci tambe.

Cu e pueblo ta mira cu porfin algo ta wordo haci na e area ey unda pa hopi aña e imagen cu por a mira ta
e ruina di e hotel. Dialuna mainta tempran, menos cu un siman despues di e decision, por a mira hende
trahando caba riba e tereno di Bushiri Hotel. Hubert de Windt, opzichter di SERLIMAR, a splica cu nan a
haya peticion di Gobierno pa pone algun ploeg disponibel pa cuminsa cu parti di limpiesa. Nan a dicidi di
pone 4 ploeg di dos persona na disposicion di e proyecto aki. E prome parti di e trabou, el a splica, ta pa
haci full e area dilanti cara pa caminda limpi. Tur sushi ta wordo deposita den containernan di
SERLIMAR. Ya caba pa ayera, nan tabatin un container yena cu sushi. “Mi no sa cuanto tempo esaki lo
tuma, pero e ta basta trabou.

E trahadonan ta balente, nos ta spera di avansa lihe,”de Windt a bisa. Mientras cu a cuminsa cu e trabou
di limpiesa, ta trahando riba e siguiente fase, con lo bay basha e edificio mes abou, sea ta haci un destaho
publico of ta invita companianan specialisa den e area aki, mientras cu lo pidi algun diseño cu e
pensamento inicial di Gabinete Mike Eman II con e area aki mester wordo remodela. “E ta un proyecto
cu mi tin hopi na pecho. Nos kier haci algo bunita pa e pueblo en general, naturalmente cu lo tin
atracccion cu lo hala atencion di turistanan tambe,”Prome Minister Eman a bisa di e plannan.