Page 21 - AWEMAINTA

AWEMainta Diahuebs, 15 December 2016 21

Pabien na Scol di Musica Rufo Wever

“E siman cu a pasa aki mi tabatin e honor di a presenta e ultimo
concierto di aña 2016 di Arubaanse Muziekschool. E concierto
aki tabatin como titulo: Christmas Gift 2016.”
Asina sr. Addonsito Croes a bisa.

“Cas di Cultura tabata e escenario principal riba cual e mas cu 250
alumnonan di scol di musica Rufo Wever a demostra nan talento
dilanti di nan mayor-, famia- y amigonan.
Presente den e sala tabatin tambe artistanan grandi di Aruba
manera nos tata di Cultura Padu Lampe, Maybeline Arends-Croes
y Lila Richardson”, sr. Croes a continua.

“Cu e articulo aki mi kier a gradici director Chucho Hoek y felicita
cada un di e maestro y alumnonan di scol di musica Rufo Wever
pa e presentacion unico y di nivel mundial cu nan a brinda cada
un presente den Cas di Cultura.
Boso ta duna cada un di nos na Aruba e siguransa cu Aruba su
cultura musical lo dura pa hopi aña mas. Hopi grandi ta boso tal-
ento y boso por competi cu cualkier artista di taya internacional”,
sr. Croes a duna di conoce.
“Loke cu mi a admira masha hopi mes ta cu e show a cuminsa na
ora y a caba na ora.
Tabatin mas cu 20 presentacion y tur a bay den un forma rapido
y profesional. Cada alumno y maestro a yuda e atardi aki cu e
logistica. E presentacionnan a ser graba y ta obtenibel riba DVD
na Scol di Musica. Aruba por ta orguyoso di boso!” Asina sr.
Addonsito Croes a conclui.