Page 104 - MIN ECEM

Smart Community di FCCA ya caba ta tumando forma

Thursday, 25 May 2017 14:14
Comparti

Ya caba e proyecto piloto na Kibaima, e asina yama Smart Community ta den un fase hopi importante di su
construccion. Ta un proyecto cu ta di 20 cas, di cual 15 ta bao di construccion y awe, nan ta yegando e punto final,
esta e punto di mas ariba. Segun director tecnico di FCCA, Edwin Tromp, tur cos ta riba schedule y ta spera cu pa
December, tur cos ta cla.

Personanan cu lo bay biba

Segun Edwin Tromp, primeramente tur hende por haci nan mes eligibel. Tin cu solicita. E proceso ta bay na FCCA.
Tin cu bisa si, cu no ta tur detaye ta cla. Pasobra tin hopi di e costonan, pero tambe ta bin e parti cu nan mester bay
pone diferente material cu ta bay pa haci e testnan y cada cas ta diferente.

Segun e ta sigui splica, ta bay tin un contract como huurdo cu FCCA pa e huur, pero tambe lo tin un contract pa e
cooperacion y parti di e investigacionnan. Kisas ta haya cu hende ta bin varios biaha cerca bo, caminda cu tin cu
duna paso pa wak sea paden of pafo pa nan sigui haci nan testnan, cu ta pone sensornan, saca e datonan cu tin y bay
analisa nan. Esey ta parti di esun cu ta bay biba den e cas.

Costo

Tromp a splica cu no tin prijs ainda pa loke ta tarifa di huur. E costo no ta conoci. No ta bay duna un cifra y despues
ta resulta otro. Ta spera cu entre awo pa Augustus, mester tin un mucho mas miho bista, unda ta bay cu esakinan.
FCCA tambe tin cu haci su parti.

Proyecto piloto

E proyecto en cuestion, ta un proyecto piloto. Tin seis partner cu ta comprometi. Obviamente FCCA tin e parti mas
grandi y Tromp a reitera cu e casnan ta di FCCA. E tereno cu e casnan ta wordo construi ariba, a huur for di
Gobierno. Pero e construccion a wordo teni na cuenta cu tur parti ta paga nan debido gasto of debido partinan.

Tin 14 compania cu ta bin di Hulanda pa pone diferente material. FCCA ta spera cu e casnan y e planta ta cla pa fin di
aña y djey e casnan ta haya nan materialnan debido na cada un di nan. Cada cas ta diferente. Te awor aki e casnan
aki ta pa huur y lo bay tin un contract pa e casnan pa cinco aña. Pesey Tromp a splica cu no ta bon pa bende e casnan
aki. Tin hopi chens cu kisas despues di cinco aña ta bendenan, pero tin cu yega asina leu ainda, mirando cu tin varios
cu tin cu wordo haci ainda, teniendo cuenta cu e casnan aki ta, manera cu nos a menciona caba, un proyecto piloto.