Page 11 - MEDIA MONITORING JULY 12, 2018

Diahuebs, 12 Juli 2018 AWEMainta 3
Parlamento completo ta sostene Minister di Husticia Andin Bikker
E notitie riba mesa di parti di Hulanda, no ta aceptabel pa Aruba
No ta mishi n’e acuerdo di cooperacion
E siman aki, Minister di Husticia, mr. Andin Bikker, banda di consulta cu Gobierno, a consulta tambe cu Parlamento riba e intencion di Hulanda, di kier trece cambio den e protocol di cooperacion di RST.
E mandatario a afirma, cu e ta hayando masha presion di Hulanda pa cambia e protocol actual di RST, pero prome cu haci esey, a dicidi di consulta cu Conseho di Minister y cu Parlamento. Manera Minister Andin Bikker a duna di conoce den su conferencia di prensa, e notitie cu el a haya ta bay mas leu cu e protocol mes.
E no a duna detaye di e presion cu e ta hayando, pero ayera tanto lider di fraccion di MEP, Rocco Tjon y e miembro di AVP den Comision di Husticia, Robert Candelaria a duna di conoce y nan a bisa e mandatario tambe pa no negocia nada y cu manera e notitie ta, cu ta riba mesa pa discuti e.o. diabierne awor den e Cumbre di Ministernan di Husticia di Reino, Minister mr. Andin Bikker no a haya ningun “bendicion” pa
negocia nada. Y por participa esaki n’e demas delegadonan n’e cumbre.
Aruba t’e unico pais den Reino, cu a crea un modelo cu ta wordo reconoci, pa loke t’e colaboracion pa cu RST. No por bay na turno na algo cu ta traha bon, pero por sinti cu Hulanda kier tin mas di bisa, esta hasta kier mina e autonomia cu Aruba tin, pesey Hulanda ta poniendo presion pa bin cu cambio, unda Hulanda kier mas poder pa bisa kico pa haci cu RST.
E cambionan aki, sigur no ta acceptable den ningun sentido di palabra.
Sr. Robert Candelaria, awe Parlamentario di AVP, a traha hopi aña como Polis, mescos tambe Rocco Tjon, maske e ultimo aki no tin e experiencia cu Candelaria tin den Polis, pero hunto nan a para pa no cumpli cu deseonan di Hulanda, cu manera menciona, kier kita poder di Korps Chef, di PG di Ministerio Publico, pa Hulanda so tin poder pa dicidi den cadena hudicial.
Si Hulanda kier mira mas cooperacion cu RST, semper ta possible, pero no cu Hulanda ta haya tur poder pa dicidi, sigur no den e cadena hudicial pa cual kier trece cambio den RST, cu a bin ta haci un bon trabao den combatimento di crimen organisa y crimen cu ta cruza frontera.
Como partnernan den Reino, semper por tin dialogo, pero pa bin mete y kita autoridad di loke Aruba ta haci riba tereno hudicial, esey sigur cu no.
Parlamento y den esaki, tur parido a duna Minister Andin Bikker e mensahe pa no habri ningun clase di dialogo, unda Hulanda ta kere di por mishi cu autonomia di Aruba pa loke ta trata husticia.
Por bisa cu tur partido den Parlamento, ta riba mesun liña di pensamento, sperando cu Minister Andin Bikker no cambia di opinion unabes na Bonaire fin di siman benidero.