Page 48 - MEDIA MONITORING JULY 20TH, 2018

10
Djabièrnè 20 Yüli 2018
Gerensia di SEHOS a disidí
Kuido médiko nesesario ta kuminsá bèk gradualmente
WILLEMSTAD.- Gerensia di SEHOS a tuma desishon pa start gradualmente ku e kuido médiko nesesario. Manera ta konosí den e dianan despues di 28 di yüni SEHOS no a realisá niun operashon ku ta planiá, pa motibu di falta di material.
Debí na e echo ku e materialnan nesesario tambe ta drentando gradualmente, hospital a tuma desishon pa start gradualmente ku e kuido médiko nesesario.
Riba djaweps 18 di yüli 2018 gerensia di SEHOS, durante e reunion general di spesialistanan médiko, a papia tokante e situashon aktual den SEHOS.
Durante e reunion aki gerensia a informá spesialistanan tokante e medidanan ku a ser tumá pa loke ta trata e skarsedat di material, remedi, aparato i personal. Tambe a papia tokante e planifikashon,
trayektonan i dato ku a wòrdu akumulá.
‘En konekshon ku esaki, despues di bon kombersashon entre e partidonan aki, a tuma e desishon pa start gradualmente ku e kuido médiko nesesario, debí na e echo ku e materialnan nesesario tambe ta drentando gradualmente. Lo sigui tin reunion regular entre e “vakgroepen”, lidernan di OK i direktor médiko.
Tambe a kuminsá ku un trayekto pa reklutá personal pa asina baha e defisiensia na personal’, asina Raiza Kibbelaar, bosero di SEHOS a duna di konosé den un komunikado di prensa.
‘Pa por garantisá kuido responsabel mester di prosedura kla banda di e datonan pa asina por monitòr i evaluá e sitashon aktual.
Pa kubri esaki a start mesora ku un trayekto
kaminda kada dos siman ta monitòr e stòk di material i e pakete di kuido ku ta mará na esaki.’
Den e komunikado ‘Gerensia di SEHOS ke enfatisá ku nos ta hopi
konsiente di e gravedat di e situashon i e posibel inkietut ku esaki por trese kuné. Nos ta hasiendo nos máksimo esfuerso pa e kuido na pashènt por sigui sosodé na un manera sigur i responsabel.
’ Gerensia ta yama danki na Minister di Salubridat, ‘nos personal, suministradónan i demas partidonan pa e esfuerso ku nan ta hasi diariamente pa e periodo aki dura mas kòrtiku posibel.’
One Laser Group LLC partner eksklusivo ku InselAir lo sigui negoshá kuné
WILLEMSTAD. - Minister pa desaroyo Ekonómiko Dr. Steven Martia a anunsiá awe ku InselAir i Gobièrnu di Kòrsou a selektá ONE Laser Group LLC, un kompania establesé na Miami, FL, USA riba un base eksklusivo, pa bira Partner stratégiko pa nos kompania lokal.
One Laser Group LLC a keda selektá dor di InselAir for di e diferente kompanianan ku for di inisio tabata interesá i a posishoná nan mes komo un partner potensial ku lo
invertí i sostené InselAir den nan plannan di ekspanshon i ampliashon di nan flete di forma ku por garantisá eksistensia di e kompania. Ambos kompania tabata den deliberashonnan pa e último 4 lunanan i ta firme riba e kaminda pa realisá plannan riba término korto i tambe plannan ku ta riba término mas largu i asina konstruí e brùg pa ekspanshon di InselAir.
E dos partidonan a pone un meta pa realisá e akuerdo final riba un término korto,
preferibel promé ku fin di ougùstùs.
One Laser Group LLC (OLG) ta konsistí di un grupo di kompania establesé na Florida, USA ku ta aktivo den un variedat di industria, inkluyendo karga aéreo, suministro industrial, logístika, alimentashon, remedi i tambe suministro na industria petrolero.
E propietarionan di OLG tabata enbolbí den pasado kaba direktamente ku maneho di aerolínea.
Apertura proyekto “Huntu grandi den mi bario”
WILLEMSTAD.- Ayera tabatin apertura ofisial di e proyekto “Huntu grandi den mi bario” ku lo mester a tuma lugá den Hòfi Wayaca di Habaai, pero debí na áwaseru e aktividat a tuma lugá den kapèl di Habaai.
Den luna di yanüari,
Stichting Birgen di Rosario den kolaborashon ku Fundashon Ansiano Foster Plan a kuminsá ku e proyekto aki pa saka hende grandi for di nan isolashon. Siudadanonan for di 60 aña di e bario di Wishi, Marchena, Sta. Helena,
Welgelegen i bisindario por partisipá tur djaweps na e aktividat den e hòfi.
Na yanüari ora e proyekto a kuminsá tabatin 17 hende grandi, i awe e ta konta ku partisipashon di 61 hende grandi.