Page 56 - MEDIA MONITORING JULY 13, 2018

opinion A11
ORANJESTAD - Luna di juni juli ta temporada cu cangreunan ta bay lama pa laba cabutiti. Esey ta tur aña ta ripiti.
Stimaruba a skirbi riba e cangreunan 5 aña pasa riba nos cangreunan cu tabata cuminda di e generacion di siglo pasa. Hopi di nos grandinan a come cangreu di mondi colo cora.
Hendenan di isla riba ta come e cangreu colo blauw. Mundialmente den restaurant di halto calidad y di bon fama nan ta pone cangreu riba nan menu. Crustaceos of schaaldieren, ta delicadesa y di alta calidad, p’esey ta paga pe. Kiermen cu nos grandinan tabata come cuminda di alta calidad. Esunnan cu ta bay coy cangreu pa come no ta yega cas cu un embra y ta hiba loke ta come. Tur sa cu e embra ta e procreado.
Tempo a pasa y a bay come cuminda cu ta bin for di exterior den e pensamento cu esey lo ta miho. Awe nos ta pasa riba cangreunan sin cu nos curason ta tembla. Aki un evolucion di nos naturalesa a kibra. E cangreu tin asina hopi potencial den nos medio ambiente. E ta come insectonan lastrero, scorpion di mondi, resto di parhanan etc..
E trayecto pa un cangreu yega lama ta basta largo. Cu cuidou e ta cana riba e 4 tenglanan di mas patras di e curpa. E dos tenglanan di parti dilanti e ta hisa den laira pa e cabutitinan cu ta pega bou di e bariga no lastra riba tera y daña e cabutitinan.
Cabutiti ta preto, bo por kere cu ta sushi tin bou di e bariga. Asina un hende yega mucho cerca di e cangreu e ta spanta y cuminsa come e cabutitinan. Ta recomendabel pa no yega mucho cerca. Hopi ta sali anochi for di nan buraco y coy caminda pa lama.
Den temporada di awasero ta mira nan. 3 bes pa aña nan ta sali, cada bes un otro grupo di cangreu. Unda cu nan ta biba y pone, ta unda cu nan a nace. Asina cu Aruba a perde masha hopi cangreu. Ta un tristesa cu hopi no a tuma na cuenta perdida di nos fauna.
Pikimento di palo canto di lama a kibra e habitat di un otro sorto di cangreu. Nos no sa miho. Otro parti di mundo, unda cu hendenan ta biba mas cerca di naturalesa sa balor di palonan cu ta bin for di lama, aki nos ta kere cu nan ta sushi, pero no ta berdad. Nan balor ta asina grandi.
Diabierna 13 Juli 2018
Olinda Rasmijn:
‘Nos cangreunan di mondi ta den peliger’