Page 11 - HOH

9 SALUD AWEMainta
S a l u d M e n t a l
Tratamento Forsa pa Salud Mental
Salbando Bida of Crusando Liña?
ORA un persona ta den e profundo di un crisis di salud mental—
nengando tratamento, cayendo den un espiral di peliger, of
desconecta di realidad—kico sociedad mester haci? Nos mester
warda te ora e pidi ayudo, of nos mester interveni hasta si esey ta
nifica bay contra su boluntad?
Esaki ta e curason di e debate tocante tratamento forsa pa salud
mental—un practica cu ta inclui hospitalisacion involuntario,
medicacion exigi pa corte, y intervencionnan di crisis sin consen-
timento. Hendenan na fabor ta bisa cu e meta ta pa salba bida.
Criticonan ta yam'e un violacion di derechonan humano.
Den hopi pais, incluyendo Aruba y Hulanda, tratamento forsa ta
legal solamente bou di condicionnan estricto—tipicamente ora
un persona ta representa un peliger cla pa su mes of pa otronan.
Pero e definicion di "peliger" hopi biaha no ta cla. Y unabez cu un
persona drenta e sistema, por ta dificil pa sali.
Hendenan na fabor ta argumenta cu den algun caso, intervencion
ta e unico opcion. Ora un persona ta experienciando psicosis,
depresion severo, of mania, e kisas no ta reconoce cu e no ta bon.
Si keda sin tratamento, e por haci su mes daño, bira un persona
sin hogar, of perde tur cos. Hopi biaha famianan ta sinti nan impo-
tente mirando un ser keri den un espiral, sin un manera legal pa
interveni te ora cosnan yega fondo.
Pero tratamento forsa tin un banda scur. E por laga cicatrisnan
emocional duradero, specialmente pa hendenan cu a sobrevivi
trauma of abuso. Wordo mara, medica, of sera den un facilidad
sin por scoge por empeora juist e condicionnan cu e tratamento
Diaranson, 30 Juli 2025
mester a trata. Hopi sobreviviente ta bisa cu nan nunca a sinti
nan mes sigur den e sistema—nan a sinti nan castiga, no yuda.
Ademas, tin e pregunta di ken ta dicidi. Profesionalnan semper
tin rason? Ta tene cuenta cu creencianan cultural of personal?
Estudionan ta mustra cu personanan di color tin mas chens di
haya un diagnostico robes of di wordo interna, loke ta revela
prehuicio racial y sistemico profundo den cuido di salud mental.
E problema mas grandi kisas ta cu hopi biaha nos ta warda mucho
largo pa ofrece sosten. En bes di intervencion tempran y compa-
sivo, nos ta depende di sistemanan di nivel di crisis cu ta activa
solamente ora cosnan ta peligroso caba. Pa e ora ey, famianan
ta desespera, pashentnan tin panico, y e confiansa a bay perdi.
Pues, kico ta e alternativa?
Expertonan ta sugeri pa expande cuido voluntario y basa den
comunidad, ofreciendo teamnan mobil di crisis, programanan
di sosten di colega (peer support), y opcionnan di tratamento
culturalmente sensitivo. Hende ta mas dispuesto na busca ayudo
ora nan ta sinti nan respeta, scucha, y cu poder—no hinca den
un skina.
Tratamento forsa kisas por ta necesario de bes en cuando. Pero e
no mester bira e norma. E mester ta e ultimo recurso—no pasobra
nos ta laat, sino pasobra nos a purba tur otro cos prome.
Si di berdad nos ta preocupa pa salud mental, e contesta no ta
djis mas cama of leynan mas estricto—e ta mas scuchamento,
mas construccion di confiansa, y mas inversion den sistemanan
cu ta cura en bes di controla.