Page 15 - HOH

ORANJESTAD (AAN): Temporada di fin di aña como e temporada di vakantie ta
periodonan unda ta espera cu hopi hende ta dicidi di viaha y bay afo.

Vocero di AZV, Solange Tchong a indica cu ta importante pa corda cu AZV ta un seguro

valido na Aruba. Ta necesario pa cumpra un seguro di viahe y accidente ora cu ta bay
viaha pa exterior.

Hopi biaha AZV ta bisa cu asina cu un persona ta presupuesta su placa pa cumpra

pasashi di avion pa bay vakantie mester corda pa pone un suma di placa pa cumpra su
seguro di viahe tambe, Tchong a remarca.

“Bo no kier haya bo den gastonan inespera. Si malesa bati na porta durante di bo

vakantie, bo kier tin tog un cobertura y esey por via di e seguronan comercial priva.
AZV mes no ta bende seguro di viahe, pero semper ta recomenda tur viahero pa haci
esaki”, a agrega.

Tin casonan cu a sosode den pasado cu AZV no a cubri. AZV nunca por cubri gastonan
di malesa den exterior, na momento cu un persona a sali riba su mes y viaha pa
exterior, e vocero di AZV a splica.

E ta lamenta cu den pasado tabata tin casonan unda hende a viaha bay otro pais, pero
tabata casonan diferente pasobra tabata personanan cu a viaha concientemente pa
busca cuido medico den exterior y eynan ta haci e situacion mas dificil ainda. Pasobra
ta viaha cu un idea determina caba pa sea busca un ayudo of un di dos opinion.

Tchong a indica cu loke ta importante ta cu e conseho di AZV ta keda pa corda cu AZV
ta valido na Aruba. Na momento cu cuido medico no por tuma lugar na Aruba tin un
proceso pa esaki y mester un aprobacion adelanta di AZV.

E mihor recomendacion ta keda cu tin cu cumpra un seguro di viahe ora bo bay exterior
pasobra AZV no kier pasa den e casonan lamentabel manera cu tabata tin den pasado
unda pashentnan riba nan mes ta bay exterior pa busca cuido medico, pa cualkier

motibo y tin ora hasta comprendibel, a bisa. Ley di AZV ta bisa cu cuido di AZV mester
tuma lugar na Aruba.